GALURA.CO.ID. – Musabaqoh Qiroatul Maulid Al Barzanji sa-Kacamatan Parongpong di Ponpes Roudlotul Ulum digelar pikeun leuwih ngandelan kacinta umat Islam ka Kanjeng Nabi Muhammad SAW.
Ku ayana Musabaqoh Qiroatul Maulid Al Barzanji sa-Kacamatan Parongpong, ogé keur ngaweuteuhkeun kayakinan umat Rasulullah kana ajaran jeung risalahna.
Tina pupujian jeung runtuyan du’a ti parapeserta Musabaqoh Qiroatul Al Barzanji sa-Kacamatan Parongpong téa, atuh copélna minangka tarékah enggoning ngarawat tradisi ngaderes Barzanji di kalangan majlis ta’lim.
Kitu antarana nu jadi udagan digelarna Musabaqoh Qiroatul Al Barzanji sa-Kacamatan Parongpong, di Ponpes Roudlotul Ulum Cisasawi, Desa Cihanjuang, Parongpong, Kabupaten Bandung Barat, Ahad, 26 November 2023.
Éta Musabaqoh Qirotul Maulid Al Barzanji téh diiluan ku 13 grup majlis ta’lim ibu-ibu di sabudeureun Kacamatan Parongpong, saperti ti Desa Cihanjuang, Ciwaruga, Cigugurgirang, jeung nu lianna.
Sakur grup majlis ta’lim diwengku ku 10 urang, kalawan durasi midang 10 menit. Dijurian ku tilu urang nu ngajén perkara kakompakan, mahroj, katut vokal.
Pinunjul kahiji, kadua, jeung katilu dina Musabaqoh Qiroatul Maulid Al Barzanji sa-Kacamatan Parongpong nu dipokalan ku Ponpes Roudlotul Ulum téh meunangkeun piala, piagem, sarta uang pembinaan.
Kitab Maulid Al Barzanji bisa disebut minangka karya sastra nu populer, nu eusina téh carita ngeunaan runtuyan kahirupan Nabi Muhammad SAW, pupujian ka Nabi, katut du’a-du’a.
Kitab Barzanji ilaharna sok dibacakeun dina acara muludan, salametan sunatan, nikahan, lagu marasan orok, ogé dina waktu malem Jumaah atawa malem Senén.
Kitab Maulid Al Barzanji nu dijieun geusan ngaronjatkeun rasa micinta ka Rosulullah SAW téh disusun ku Sayyid Zainal ‘Abidin Ja’far bin Hasan bin ‘Abdul Karim al-Husaini asy-Syahzuri al-Barzanji, nu gumelar di Madinah taun 1128 H/1716 M.
Anapon eusining Kitab Maulid Barzanji, gurat badagna mah ngaguar lalakon kahirupan Nabi Muhammad SAW kayaning rundayan kulawargana, kahirupan mangsa keur budak, mangkat rumaja, kagiatan usaha dagangna, nikahna Rosul ka Sayyidah Khadijah, mangsa diangkat jadi Rosul waktu umur 40 taun, dakwahna geusan nyebarkeun ajaran Islam, tepi ka kisah wafatna Rosul.
Baca Juga: Ngurus Sertifikat Tanah, Baheula Jeung Ayeuna
Dina Kitab Madarijus Shu’ud, Syekh Muhammad Nawawi Banten, mertélakeun, kautamaan Maulid Barzanji lir média nu mampuh jadi sababiyah datangna rupa-rupa kahadéan, sarta nu macakeunana baris meunangkeun karidoan ti Allah SWT.
Tahapan maca Barzanji diawalan ku maca Surah Al Fatihah, hadiahan pikeun Rosulullah katut Sayyid Ja’far al-Barzanji. Laju umajak ka jamaah maca solawat Nabi, tuluy ngaderes lalakon Nabi nu diwengku dina sababaraha bab.
Salasaurang juri Musabaqoh Qiroatul Maulid Al Barzanji sa-Kacamatan Parongpong, nu ogé pangurus Ponpes Roudlotul Ulum, HM Bahtiar AB, ngécéskeun, dina bab kakompakan, unsur nu diajén téh antarana adumanisna runtuyan bubuka bacaan, pairan jamaah sabot réngsé hiji perkara bagéan eusi kitab, sarta ogé pidangan yél-yél parapatandang.
Sedengkeun dina bab mahroj, luyu jeung hartina mahroj, diajén ngeunaan lafadna nu pas jeung katangtuan mahroj saperti hadé kocapna, bener, paséh, sarta tartil.
“Tah, dina perkara vokal mah nu diajén antarana waé pasna artikulasi lagu ngalafadkeun eusining Kitab Barzanji,” ceuk HM Bahtiar AB.
Dimimitian ti isuk mula tug parat tepi ka soré, éta Musabaqoh Qiroatul Maulid Al Barzanji sa-Kacamatan Parongpong nu lumangsung di Aula Ponpes Roudlotul Ulum téh gegek dilalajoanan warga ti nu jauh jeung deukeutna, teu kolot teu budak.
Teu tinggaleun, parapatandang majlis ta’lim ibu-ibu gé ngahadirkeun bobotohna, dipasieup ku rupa-rupa yél-yél kokojona.
Ku digelarna éta Musabaqoh Qiroatul Maulid Barzanji sa-Kacamatan Parongpong téa, HM Bahtiar AB miharep, malar mingkin terus karawat rasa micinta umat Islam ka Rosulullah.
“Lian ti ajang silaturahim jeung miara tradisi maca Barzanji, ogé urang sadayana masing tiasa istikomah ngalap ajén-inajén tuladan perjoangan Kanjeng Nabi Muhammad SAW kalayan dilarapkeun dina kahirupan urang sapopoé,” ceuk HM Bahtiar AB. ***