GALURA – Pemkab Sumedang kiwari keur ngusahakeun malar warga nu daragang hui cilembu di Cadas Pangeran bisa ngajongko di Rest Area Tol Cisumdawu.
Ku ayana Tol Cisumdawu (Cileunyi-Sumedang-Dawuan), kendaraan nu ngaliwat ka Cadas Pangeran bet tuluy ngurangan, jadi matak tiiseun pikeun nu daragang hui cilembu.
Samemeh aya Tol Cisumdawu, warga nu lalar liwat di Cadas Pangeran teh sok nyimpang mareuli hui cilembu minangka oleh-oleh.
Baca Juga: Market Day Sekolah Alam Quran Nur Madani, Numuwuhkeun Jiwa Wirausaha Siswa Dibarung Kajujuran
Ayeuna, kitu tea, kendaraan nu ngaliwat jalur Cadas Pangeran jadi ngurangan, balukarna jongko hui cilembu jeung peuyeum di eta jalur ge jadi tiiseun.
Ku kituna, Pemkab Sumedang satekah polah nyiar bongbolongan malar nu arusaha dagang hui cilembu di Cadas Pangeran teh bisa tetep lumangsung.
Dipokalan ku Dinas Koperasi Usaha Kecil Menengah Perdagangan dan Perindustrian Kabupaten Sumedang, geus ngabaladah ngadata nu daragang hui cilembu jeung peuyeum di Cadas Pangeran.
Baca Juga: Sistematika Naskah Pangeran Wangsakerta teu Beda jeung Karya Tulis Ilmiah Jaman Ayeu
Ceuk Kepala Dinas Koperasi Usaha Kecil Menengah Perdagangan dan Perindustrian Sumedang, Hari Tri Santosa, engkena eta nu daragang teh baris diusahakeun sangkan bisa ngajongko di Rest Area Tol Cisumdawu.
"Dinas terus koordinasi jeung nu daragang hui Cilembu di Cadas Pangeran. Sabada didata, aya 29 padagang nu salila ieu aktif dagang di ieu jalur," pok Hari, Rebo, 15 Februari 2023.
Nu daragang hui cilembu di Cadas Pangeran teh lolobana mah urang Desa Cijeruk, Kacamatan Pamulihan.
Baca Juga: Di Museum Negeri Sri Baduga Naskah Pangeran Wangsakerta Aya Opat Seri Sejarah
Maranehanana miharep bisa ngajongko di Rest Area Tol Cisumdawu kalawan haratis.
"Maranehanana daek pindah ka rest area, tapi jongkona haratis. Lian ti eta, oge aya pamundut sangkan di Cadas Pangeran dijieun tempat wisata malar jadi pangjugjugan balarea. Eta aspirasi ditampung jangeun bahan sawala nyiar bongbolongan,” ceuk Hari.
Satuluyna ge Hari ngeceskeun, sanggeusna Seksi 2 jeung Seksi 3 Tol Cisumdawu operasional, omset nu daragang hui cilembu di Cadas Pangeran teh bet laju nyirorot.
Baca Juga: Drs Aca Nyusud Naskah Carita Purwaka Caruban Nagari tepi ka Palembang jeung Banjarmasin
Eta kaayaan, meujeuhna, sabab loba kendaraan nu antukna milih ka jalan tol alatan waktuna leuwih singget.
“Ngan, satekah polah Dinas ngungkulan eta kaayaan sangkan nu daragang hui cilembu bisa terus nuluykeun usahana,” pok Hari. ***