Barudak Disabilitas jeung Yatim, Nobar Film Animasi ‘Kiko in the Deep Sea’

GALURA - Samémeh diputer di bioskop-bioskop, MNC Animation jeung MNC Pictures ngagelar nobar (nonton bareng) atawa lalajo bareng film animasi Kiko in the Deep Sea jeung barudak disabilitas katut yatim.

Puluhan barudak disabilitas jeung yatim diajak lalajo film Kiko in the Deep Sea di Bioskop Metropole XXI, Jakarta, minggu kamari.

Lian ti jadi kagiatan nu matak pikagumbiraeun, lalajo film animasi Kiko in the Deep Sea téh minangka wujud miduli ka barudak disabilitas jeung yatim.

Geus sakuduna maranéhanana ulah ieuh diapilainkeun, tapi terus dihiap sangkan meunang pangalaman sakumaha ilaharna barudak lianna.

Éta acara téh minangka salasahiji tina runtuyan Film Animasi Karya Anak Bangsa di bioskop ti mimiti 23 Februari 2023.

Baca Juga: PWI Kota Metro Ngadongdon PWI Jawa Barat, Kataji ku Program UKW 1.000 Wartawan jeung Perumahan Wartawan

"Kuring miharep ieu film animasi Kiko in the Deep Sea bisa ngahibur maranéhanana, nambah luang pangaweruh, sarta numuwuhkeun sikep réla bakorban tur wani geusan merjoangkeun kahadéan," ceuk Arbani Yasiz, dubber dina éta film.

Arbani gé miharep, sakumna barudak nu lalajo Kiko in the Deep Sea sing bisa kageuing inspirasina enggoning ngagelar karya nu nyambuangkeun Indonesia.

"Moga waé sanggeusna lalajo ieu film téh maranéhanana gé mampuh ngagelar kamotékaran nu leuwih hadé batan méméhna, tur kamotivasi boga cita-cita ancrub kana dunya animasi," pokna deui.

Lian ti Arbani Yasiz, ogé aya Anastasia Amalia, nu jadi dubber dina ieu film animasi téh.

"Kalintang bingahna réhing maranéhanana barudak disabilitas jeung yatim téh sakitu gumbirana," ceuk Anastasia Amalia.

Baca Juga: M. Fadjroel Rahman: Antara Puisi, Kazhakstan, jeung Bandung

Baca Juga: Putri Anjungsari (39) Maharaja Sakti Miang ka Kabuyutan Linggahyang, Seja Ngalap Kaweningan Prabu Linggabuana

Lalajo film animasi “Kiko in the Deep Sea” bareng jeung barudak disabilitas katut yatim, di Bioskop Metropole XXI, Jakarta, minggu kamari.*

Film Kiko in the Deep Sea nyaritakeun kahirupan Kiko jeung babaturanana di jero laut.

Diwangun ku misi silitulungan, ogé aya hiburan, carita Kiko, Tingting, Poli, Patino, Lola, Karkus, sarta Pupus gé nodél kana tarekah ngungkulan ruksakna ekosistem di Kota Asri di jero laut.

Éta carita Kiko dipiharep ngahudang imajinasi barudak kana lalampahan geusan nyalametkeun tur ngajaga ekosistem laut.

Di sagédéngeun éta, tuwuhna sikep nguntun sosobatan jeung réla bajoang pikeun terus ngabéla kahadéan.

Ku leuwih jero mikawanoh lingkungan laut, dipiharep barudak gé mingkin sumanget geusan ngajaga kaberesihan kahirupan nu aya di laut.

"Kalawan pidangan tata suara nu matak pogot, film Kiko in the Deep Sea dipiharep nguniangkeun sumanget barudak pikeun babarengan ngajaga kalumangsungan lingkungan kahirupan," ceuk Titan Hermawan, CEO MNC Pictures.***

Baca Juga: Mataram Konfrontasi jeung Kumpeni di Batavia, Umbul Sukakerta Jadi Bupati Sukapura