Network
GALURA – “Abdi dugi ka nangis nongtonna. Pikasebeleun tah nu janten ramana Ratna,” ceuk hiji siswa ti SMA Pasundan 3 Bandung, sabubaranana lalajo Gala Premiere Gita Cinta dari SMA di Citywalk XII, Jalan Cihampelas, Kota Bandung, Minggu (5/2/23) kaliwat.
“Muhun, abdi gé sami. Sedih tuda,” ceuk baturna.
Nu dimaksud ramana Ratna téh, dina ieu film, nya Dwi Sasono. Dwi Sasono jadi sosok bapa nu tegas, micinta anak nu ngan hiji-hijina, miduli mangsa pikahareupeun nu jadi anak, sarta boga pilihan nu panghadéna sual jodo.
Kalawan tegas tur aya kesan galak, manéhna ngalarang hubungan Galih jeung Ratna. Galih anu ngan saukur tukang ngajualan kaset, piringan hitam, jeung buku-buku urut, ku bapana Ratna disina megatkeun hubungan. Galih jeung Ratna kudu papisah.
Dwi Sasono nyebutkeun, peranna jadi bapa Ratna téh hiji tegoran pikeun para bapa di Indonesia.
“Muhun, sim kuring méré conto sangkan bapa-bapa ngeunteung tur refleksi diri dugi ka paham… oh enya kuring téh (pikasebeleun) kitu," ceuk Dwi Sasono.
Baca Juga: Gala Premiere-na Poé Ieu, ‘Gita Cinta dari SMA’ Difilmkeun deui bari teu Mopohokeun 'Orisinalitas'
Adegan nu ‘pibapereun’ nu lalajo téh lain hiji-hijina éta wungkul. Aya deui adegan séjénna anu mungguh ngaduk-ngaduk émosi.
Horéng deuih lain rumaja SMA waé nu ngarasa katoél émosi ku plot carita Gita Cinta dari SMA téh, tapi ogé ti kalangan mahasiswa.
“Terus terang, abdi dugi ka bareubeu kieu nongtonna,” ceuk Nabila Oktapiani, mahasiswa sastra Inggris, Fakultas Ilmu Seni dan Sastra (FISS), Universitas Pasundan Bandung. Kituna téh semu nyéréngéh bari nyumputkeun beungeut, kaisinan.
Komo nu geus rada umuran mah, anu taun 1979-an ngalaman lalajo Gita Cinta dari SMA versi Rano Karno – Yessy Gusman, teu kuat nahan rembesna cimata. Lain ukur pédah “nostalgiaan”, tapi mémang carita jeung akting pamaénna bisa ngahudang émosi keur sakumna nu lalajo.
Baca Juga: Putri Anjungsari (23), Imah Hasan Dibegal jeung Didatangan ku Prajurit Cirebon
Romantika cinta Galih - Ratna
Ti kamari kénéh (9 Februari 2023), film Gita Cinta dari SMA téh geus mimiti diputer di bioskop-bioskop sakuliah Indonesia. Saméméhna, 5 – 6 Februari 2023, di-galapremier-keun heula di Ciwalk XXI Bandung jeung Grand Indonesia Jakarta Pusat.
Ieu film nu ngangkat romantika cinta Galih jeung Ratna téh disutradaraan ku Monty Tiwa. Ari nu mroduksina mah Starvision Plus, kalayan produserna Ir. Chand Parwez Servia jeung Fiaz Servia.
Saenyana ieu film téh mangrupa remake (dijieun ulang) tina film garapan 1979, dina judul nu sarua. Karakter Galih Rakasiwi nu dipaénkeun ku Yesaya Abraham, jeung karakter Ratna Suminar ku Prilly Latuconsina, dina film orisinalna mah dipaénkeun ku Rano Karno (Galih) jeung Yessy Gusman (Ratna).
Diangkat tina novel legendaris karya Eddy D. Iskandar, mimitina Gita Cinta dari SMA téh mangrupa carita nyambung (carnyam) di majalah Gadis. Sanggeus 1979 dijieun film, aya deui film dina versi séjén, anu sarua diangkat tina novel Gita Cinta dari SMA, nyaeta Galih & Ratna (2017), sutradara Lucky Kuswandi (pamaénna Refal Hady jeung Sheryl Sheinafia), saméméh ahirna, taun 2023 ieu, digarap ku sutradara Monty Tiwa dina produksi Starvison Plus.
Baca Juga: Ngareuah-reuah HPN 2023 di Sumut, Karya Urang ‘Galura’ Asup Buku Antologi Puisi Wartawan
Dina film versi nu ayeuna Monty Tiwa mungguh mertahankeun orisinalitas, setting caritana gé lumangsung taun 1984, di Kota Bandung.
Monty Tiwa ngungkabkeun rasa kabungahna bisa ngagarap deui film dumasar novel Eddy D. Iskandar. Disebutkeun “ngagarap deui” téh, cenah, pédah saméméhna kungsi ogé nyieun film Roman Picisan (Rompis) anu pada-pada diangkat tina novel Eddy D. Iskandar, sarta duanana mangrupa film remake. Roman Picisan orisinal (1980) pamaenna Rano Karno jeung Lydia Kandou, sedengkeun remake-na (2018) pamaenna Arbani Yasiz jeung Adinda Azani.
Monty Tiwa ngaku, ngagarap film Gita Cinta dari SMA téh jadi hiji kahormatan, lain saukur tantangan.
“Da tantangan mah, rék ngagarap film nu kumaha waé gé kana tangtos aya tantanganana. Tapi kahormatan, sesah dibalikan deui, kedah dienyakeun nalika aya kasempetan,” ceuk Monty.
Iwal ti Prilly jeung Yesaya, nu maraén dina ieu film, di antarana, Arla Ailani, Chantiq Schagerl, Abun Sungkar, Fadi Alaydrus, Putri Ayudya, Dwi Sasono, Unique Priscilla, Dewi Gita, Iyang Darmawan, jeung Candil.
Ceuk Parwez, sakumaha novel jeung filmna nu ti heula, film Gita Cinta dari SMA versi Yesaya Abraham – Prilly Latuconsina gé baris dituluykeun ku film Puspa Indah Taman Hati.
Sakumaha disabit di awal, film Gita Cinta dari SMA téh ayeuna (ti kamari kénéh, 9 Februari 2023) keur diputer di bioskop-bioskop sakuliah Indonesia. Najan ngeukeuhan orisinalitas, ieu film masih relate alias nyambung jeung kahirupan rumaja katut kondisi jaman ayeuna.***
Baca Juga: Milu Makalangan dina Serial ‘The Last of Us’, Christine Hakim Kapeto Jadi Ilmuwan Indonesia
Baca Juga: Dina Film Serial ‘The Last of Us’, Jakarta jadi Sumber Sasalad
