Network
GALURA - Ida Widawati, ngaranna ngajaul mapakan méga, nyeungitan lemah cai. Iwal ti dina mesin pencari google, ngaran Ida Widawati kaunggel dina buku Divine Inspirations: Music and Islam in Indonesia (2011), “Many new instruments were constructed and used, especially plucked and bowed instruments. Eventually, many well-known vocalists became involved in the group, incliding Neneng Dinar, Euis Komariah, Ida Widawati, Taty Saleh and Hetty Koes Endang.” (Zanten, 2011:254).
Kitu deui hasil rekaman kasét komersial nu dihaleuangkeun ku Ida Widawati, tepi ka ayeuna keur jadi bahan panalungtikan ilmuwan asing.
Ngaran Ida Widawati dicatet dina sawatara buku, saperti Accessions List: Southeast Asia, Volume 16 (1990:460); World Music Volume 2: Latin & North America, Caribbean, India, Asia and Pasipic (2000); jeung buku Henry Spiller nu judulna The Tradisional Sounds of Indonesia (2004) nu nyatetkeun ngaran Ida Widawati dina kaca 308.
Baca Juga: Nénéng Dinar Ngajarkeun Tembang Sunda di Ranggon Cijagra
Ngaranna gé dicatet deuih dina buku Apa Siapa Orang Sunda (2003), kaselir salasaurang warga Sunda nu méré konstribusi aktif kana seni jeung éntitas urang Sunda di lemah cai jeung mancanagara, liwat profésina minangka seniwati.
Buku Énsiklopedi Sunda nuliskeun ngaran Ida Widawati sajajar jeung ngaran Ali Sadikin, Aom Kusman, Kang Ibing, katut tokoh Sunda séjénna.
Bawirasa, ngaran Ida dina kahirupan tembang Sunda Cianjuran jeung kawih degung, ka ayeunakeun jadi ikon atawa kiblatna para juru tembang Sunda. Préstasi jeung karya Ida Widawati geus diaku ku para panalungtik seni tradisi ti mancanagara.
Baca Juga: Nénéng Dinar: Kudu Aya ‘Political Will’ ti Pamaréntah pikeun Mekarkeun Seni Tradisi di Jawa Barat
Ida Widawati gumelar ti kulawarga seni. Almarhum ramana, Rd. Toto Muthallib, mangsa jumenengna dipikawanoh ahli ibing Sunda, saentragan jeung Enoch Atmadibrata.
”Tapi, nalika jumenengna, pun bapa mah sagala rapékan. Anjeunna tiasa ogé ngadamel gamelan Sunda,” ceuk Ida Widawati nu ti bubudak hirup jeung nu jadi uwana.
Nyuprih élmu ti SD tepi ka SMAN 1 Garut, dituluykeun kuliah di Jurusan Antropologi Universitas Padjadjaran (Unpad), Ida Widawati nu ngadahup ka H. Héry Supriadi dititipan tujuh budak jeung sawatara incu.
Baca Juga: Ida Widawati, Ngigelan Jaman ku Mageuhan Seni Tradisi
Hirupna icikibung dina seni tradisi metik hasil. Sawatara nagara geus katincak ku Ida, nu kiwari mingpin Lingkung Seni Malati.
Malah, nu jadi reueus Ida mah, pangalaman manggung di mancanagara, sataun saméméh manggung téh ngaranna geus dibéwarakeun, saperti manggung di wewengkon Eropa.
“Alhamdulillah, upami simkuring manggung di mancanagara, rohangan gedong téh sok pinuh waé, nu narongton kalandep ku pidangan seni Sunda Cianjuran jeung seni wanda degung,” ceuk Ida Widawati, anu dina taun 2013, jeung Lingkung Seni Malati-na, kungsi ngayakeun Pasanggiri Tembang Sunda Cianjuran Piala Ida Widawati.
Hanjakal, éta pasanggri téh henteu nuluy, alatan alesan klasik: teu aya waragad!***
Baca Juga: Milu Makalangan dina Serial ‘The Last of Us’, Christine Hakim Kapeto Jadi Ilmuwan Indonesia
Baca Juga: Dina Film Serial ‘The Last of Us’, Jakarta jadi Sumber Sasalad
