GALURA – Sabada maén dina film drama Amerika Eat Pray Love (2010), Christine Hakim makalangan deui dina serial Amerika The Last of Us anu tayang di Los Angeles, California, Amerika Serikat, 9 Januari 2023 ka tukang.
Dina Gala Premiere-na di Amerika Serikat, Christine milu ngaluuhan, kalawan difasilitasi ku Direktorat Perfilman, Musik dan Media, Direktorat Jenderal Kebudayaan, Kementerian Pendidikan, Kebudayaan, Riset dan Teknologi.
“Ieu téh mangrupa dukungan Direktorat Perfilman, Musik dan Media dina ngaaprésiasi para insan film Indonesia anu geus makarya sarta nyambuangkeun ngaran Indonesia di dunya internasional,” ceuk Ahmad Mahendra, Direktur Perfilman, Musik dan Media dina siaran pers-na anu dikirimkeun ka Galura.
Baca Juga: Dina Film ‘The Last Of Us’, Jakarta jadi Sumber Sasalad
Trending topic
Serial The Last of Us téh geus nayangkeun épisode ka-2 dina kanal HBO jeung HBO Max, tur geus dilalajoanan ku 5,7 juta panongton dina tayangan munggaranana. Ngaran Christine Hakim malah sempet jadi trending topic di Twitter dina 23 Januari 2023.
"Kuring muncul dina épisode ka-2 dina serial HBO The Last of Us, jadi ilmuwan," ceuk Christine Hakim dina unggahan Instagram-na, anu basa aslina ditulis ku basa Inggris.
Mémang, dina éta serial, Christine Hakim nu merankeun Ratna Pertiwi muncul dina épisode ka-2, kalawan judulna 'Infected'. Ari sakabéhna mah ieu serial téh tamat 10 épisode (musim kahiji).
Baca Juga: Hikmah Pandemi, Doel Sumbang leuwih Getol Nyanggi Lagu Anyar
The Last of Us téh serial anu diadaptasi tina gim anu ngaranna sarua. Nyaritakeun Joel (Pedro Pasca) anu nyusupkeun tur ngawal Ellie (Bella Ramsey) pikeun meuntasan Amerika Serikat sabada ancurna peradaban modérn.
Éta kajadian téh dimimitian ti 20 taun ka tukang balukar munculna virus jamur. Para korban anu katerap/kainféksi ku éta virus bakal jaradi zombi anu gangas kacida, ‘haus darah’, tur bisa népakeun/ngainféksi jalma-jalma lianna tepi ka ngabalukarkeun pandemi global.
Munculna Christine Hakim dina épisode ka-2 anu lokasina di hiji universitas di Jakarta, bisa jadi awal ayana inféksi jamur Cordyceps. Engkéna baris kaungkab asal muasalna virus nu ngalantarankeun sakumna jalma di dunya jaradi zombi.
Dina ieu serial, iwal ti Christine Hakim, aktor Yayu Unru ogé milu maén kalawan merankeun karakter Agus Hidayat, jenderal TNI bintang 3.***
Baca Juga: Doel Sumbang: Lagu ‘Runtah’ Asalna di Susunan Panghandapna