Yusril Ihza Mahendra Jadi Pengacara Irfan Nur Alam, Ngapraperadilankeun Kejati Jabar

GALURA.CO.ID -Pakar hukum Yusril Ihza Mahendra jadi penasehat hukum Irfan Nur Alam (INA) nu ditahan Kejati Jabar lantaran jadi tersangka kasus dugaan korupsi Pasar Cigasong Majalengka. Irfan Nur Alam teh Kepala Badan Kepegawaian dan Pengembangan Sumber Daya Manusia (BKPSDM) Majalengka nu oge seuweu H.Karna Sobih, manten bupati Majalengka.

Yusril Ihza Mahendra jadi penasehat Irfan Nu Alam memang ku H.Karna Sobahi jauh samemehna geus disebut-sebut. Ngan satuluyna diragukeun sabab nalika INA ditahan ku Kejati Jabar anu mencenghul samalah pengacara sejen. Senen 1 April 2024, Galura meunang kapastian ngeunaan Yusril Ihza Mahendra ditunjuk jadi penasehat hukum INA.

"Jaksa sacara professional kedah ngawaler kana praperadilan anu tos didugikeun tampa ngulur-ngulur waktos deui, minangka rasa tanggel waler rengse netepkeun Irfan Nur Alam salaku tersangka," ceuk Yusril.

Baca Juga: Bupati Manten Majalengka H. Karna Sobahi: Ajenan Proses Hukum, Pentingna Prinsip Azas Praduga Tak Bersalah

Yusril ngapraperadilankeun Kejati Jabar dina kasus INA. Pengadilan Negeri (PN) Bandung, geus ngaluarkeun panggilan sidang nomor: 5 Pid.Pra/2024/PN.Bdg. Disebutkeun minangka juru sita pengganti dina Pengadilan Negeri Jakarta Selatan kana parintah oge ditunjuk ku Ketua Pengadilan Negeri keur ngalengkepan surat pamenta Ketua Pengadilan Negeri Bandung dina 28 Maret 2024.

Dijelaskeun dina surat bieu: Telah Dipanggil Dengan Resmi Kepada: Nama: Prof. Dr. Yusril Ihza Mahendra, SH., MSc dkk Pekerjaan : Para Advokat dan Konsultas Hukum Alamat : Kantor Hukum Ihza & Ihza Law Firm SCBD di Jakarta Sebagai: Pemohon Praperadilan untuk hadir di Persidangan Umum Pengadilan Negeri Bandung Kelas IA khusus Jalan RE Martadinata Kota Bandung pada hari, Selasa 16 April 2024 jam 10.00 WIB.

Salian INA oge geus ditahan opat poe samemehna: Andi Nurmawan ti pihak swasta. INA jadi tersangka, 14 Maret 2024 sarta 26 Maret 2024 dipapagkeun ku Kejati Jabar pikeun ditahan.

Tersangka lianna Andi Nurmawan jeung Maya ditetepkeun tersangka 1 taun katukang. Andi Nurmawan kakara ditahan, ari Maya nepi ka kiwari masih tacan ditahan.

Sataun kaliwat ieu kasus siga anu dideum. Maret 2024 ujug-ujug diumumkeun Kepala BKPSDM Majalengka jadi tersangka, Kemis 14 Maret 2024 peuting ditepikeun Kasipenkum Kejati Jabar Nur Sricahyawijaya S.H., M.H. Salasa 26 Maret 2024 langsung ditahan. Kejati Jabar netepkeun INA jadi tersangka rengse mariksa sababaraha kali Andi jeung Maya.*** Ayank R Sambara