Network
GALURA.CO.ID- Bupati Bandung Dadang Supriatna ngaresmikeun Sasak Cikeruh di Desa Tegalluar, Kecamatan Bojongsoang, Kabupaten Bandung, Saptu, 30 Maret 2024.
Bupati miharep sasak nu panjangna 30 meter nu ngahubungkeun Kecamatan Bojongsoang jeung Ciparay teh gedè manpaatna pikeun masarakat.
Dadang Supriatna nyebutkeun sasak nu diwargadan beyana kana Rp 12 miliar, kaasup béya ngeruk Walungan Cikeruh tèh bisa ngungkulan caah di wewengkon Sapan Tegalluar jeung sabudeureunana.
"Ieu tèh momen sajarah, kumargi sasak ieu tos lami dianti ku masarakat Tegalluar sareng sabudeureunana, " ceuk Dadang Supriatna bari ngedalkeun bismillahirrahmanirrahim, marengan diresmikeunana Sasak Cikeruh.
Dadang Supriatna nètèlakeun, sasak ihhtiar pikeun ngèntèngkeun aksesibilitas jeung ngaronjatkeun konektivitas warga di sababaraha kecamatan nu samèmèhna dipisahkeun ku Walungan Cikeruh.
Inyana nyebutkeun, pangwangunan Sasak Cikeruh jeung sababaraha hiji pangwangunan infrastruktur sèjènna bukti nyata komitmen Pemkab Bandung dina legana pangwangunan infrastruktur nu alus di Kabupaten Bandung.
"Ieu tèh impenan masarakat Tegallua sareng sabudeureunana. Kumargi simkuring ngaraoskeun langsung kaayan banjir sareng runtah patalayah abada banjir kumargi Sasak Cikeruh sateuacanna depek teuing ngahalangan ngamalirna cai, " ceuk Dadang Supriatna.
Baca Juga: Dina Rembug Bedas, Kepala Desa Lampegan Miharep 13 Program Prioritas Bupati Bandung Nuluy
Minangka warga asli Desa Tegalluar, waktu inyana masih jadi kepaala desa taun 2016 kungsi ngusulkeun ngawangun Sasak Cikeruh. Ngan, waktu rèk diwangun pisan statusna pindah jadi kawenangan Pemprov Jabar. Anggaran ti APBD nu geus dialokasikeun tèh teu kaserep.
Taun 2019, basa Dadang Supriatna jadi anggota DPRD Propinsi, pangwangunan sasak Cikeruh diusulkeun ka Pamarèntah Provinsi Jawa Barat, tuluy disatujuan. Ngan anggaranana dicoret sabab balukar recofusing Covid 19.
"Alhamdulillah, ayeuna saparantos simkuring janten Bupati, dialokasikeun anggaranana kanggo pangwangunan Sasak Cikeruh tèh. Isin ogè simkuring salaku urang Tegalluar upami banjir di dieu teu bèrès-bèrès," ceuk Dadang Supriatna.
Kepala Dinas PUTR Kabupaten Bandung Zeis Zultaqawa ngaku kacida syukur lantaran geus sababaraha kali kahalangan dina pangwangunan Sasak Cikeruh nu antukna bisa dirèngsèkeun.
Zeis nganuhunkeun ka Bupati Dadang Supriatna katut masarakat satempat nu sakitu sumanget ngarojong proyek pangwangunan Sasak Cikeruh.
Sasak ieu, ceuk Zeis memang kacida penting pikeun masarakat di sababaraha kecamatan minangka jalur alternatif utamana warga Majalaya, Ciparay jeung Tegalluar ka Kota Bandungkeun. Kitu deui sabalikna.
"Mugia manpaat kanggo masarakat,. Insya Allah Sasak Cikeruh ieu tos nyumponan aspek kasalametan sareng kaamanan kumargi sateuacanna tos ngalangkungan tahapan pangujian," cuk Zeis. ***
Sopandi
