Network
GALURA.CO.ID -Pj Bupati Majalengka Dedi Supandi sagancangna ngagodog sababaraha solusi keur ngaoptimalkeun Tempat Pembuangan Akhir Sampah (TPA) Heuleut. Kaasup jalan kaluar keur warga nu dumuk teu jauh ti eta TPA.
Pj Bupati Majalengka nyebutkeun, pikeun ngarengsekeun pasualan runtah, memang butuh proses sarta kudu sabar. "Pamugi ieu tarekah bagian ti solusi," ceuk Dedi Supandi, nalika ngaroris TPA Heuleut, Kabupaten Majalengka, Kemis (18/01/2024).
Pasualan runtah di Majalengka, ceuk Pj Bupati Majalengka, kudu ngawengku aspek girang jeung hilir. Dicontokeun keur aspek girang aya metode 3R: reduce (ngurangan), reuse (ngagunakeun deui), recycle (daur ulang).
Dedi meunteun sanajan 3R lain hiji metode anyar, tapi cukup efektif dina ngokolakeun runtah. Tinggal nambahan inovasi sangkan kinerja 3R bisa lumangsung leuwih maksimal.
"Aspek girang, sapertos konsep sareng solusi 3R, kumaha ngangkut runtah rumah tangga ka dieu langkung sakedik," ceuk Dedi.
Ngeunaan aspek hilir, Dedi netelakeun, memang perelu ayana rojongan anggaran. Saperti ditambahanana mesin keur ngangkut runtah, loader jeung ekskavator.
"Ditambih deui aya pengolahan sampah terpadu nu memang kedah ngagunakeun alat. Nu saterasna ku simkuring bakal ngintun serat, rencanana bakal ngadamel tempat ngokolakeun runtah," ceuk Dedi.
Keur nambahan kapasitas runtah di TPA Heuleut, pihakna oge ngarencanakeun lahan nu masih nyesa dibeberes.
