Network
GALURA.CO.ID -Bupati Ciamis, Herdiat Sunarya, Senin, 11 Desember 2023, di Aula Setda, ngistrenan 5 kepala desa, hasil Pemilihan Antar Waktu (PAW).
Dina pidato pangbageana, sarengsena ngistrenan para kades, Bupati Herdiat meupeujeuhan ulah bongkar pasang perangkat desa. Mangpaatkeun nu geus aya.
“Tugas Bapa Ibu kapayun abot pisan, mayunan Pilpres sareng pileg. Ciptakeun pesta demokrasi nu aman sareng lungsur-langsar. Benten pilihan ulah dugi ka ngabalukarkeun pacongkedan,” cuk Bupati Ciamis nu 31 Desember 2023 purna bakti.
Baca Juga: Herdiat Sunarya Purna Tugas, Digantina Ngaran Kabupaten Ciamis Jadi Kabupaten Galuh Tacan Ngawujud
Bupati Ciamia oge amanat ka para kades sangkan ulah hayang diladenan ku masarakat. “Kades teh abdi masyarakat, mudah-mudahan Bapa Ibu tiasa ngaladenan masarakat sahade-hadena,” pokna.
Dina eta kasempatan Bupati Ciamis oge ngawilujengkeun ka para kades nu dilantik ngajalankeun amanah sarta ngadungakeun jadi pamingpin nu sukses salila ngajabat.
Lima kades hasil PAW altanan kades samemehna tilar jeung ngecagkeun kalungguhan kalayan rupa-rupa kasang tukang. Lima kades hasil PAW nu diistrenan teh:
- Agus Hermawan, S.Pd, Kepala Desa Salakaria, Kecamatan Sukadana,
- Majur, Kepala Desa Panawangan, Kecamatan Panawangan,
- Dedi Hidayat, A.Md, Kepala Desa Rancah, Kecamatan Rancah,
- Devi Yulviana, Kepala Desa Ciomas, Kecamatan Panjalu,
- Sigit Kuswantoro, Desa Kalapasawit, Kecamatan Lakbok.
Wakil Bupati Ciamis, para Kepala OPD, para camat jeung tamu ondangan sejenna ngaluuhan diistrenana kades PAW.***
