GALURA.CO.ID -Bupati Bandung, Dadang Supriatna Kemis pabeubeurang, 7 Desember 2023, ngalaksanakeun Rembug Bedas di tilu desa. Dimimitian tabuh 13.00.
Rembug Bedas nu ka-62 digelar di Balè Desa Rahayu Kecamatan Margaasih, Rembug Bedas ka-63 di Balaè Desa Pameuntasan Kecamatan Kutawaringin, jeung Rembug Bedas ka-64
di Balè Desa Cilampeni Kecamatan Katapang.
Plt Kepala Desa Rahayu Kecamatan Margaasih, Ade Muhyi nepikeun patalèkan atawab aspirasi ka Bupati Bandung. Kahiji, inyana miharep pinjaman dana bergulir keur UKM di Desa Rahayu ditambah jumlah penarima mangpatna.
Nu kadua, ceuk Ade, patali usum hujan, sababaraha hiji walungan nu aya di Desa Rahayu geus dararèèt, perlu dikeruk, sangkan teu banjir.
"Aya walungan nu memang sanès kawenangan desa, tapi BBWS Citarum. Aya tanggul walungan nu jebol, pamukiman kacaahan. Saperti wengi tadi kajantenan pamukiman di RW 05, 07, 08 sareng RW 17 kakeueum, " pokna.
Ceuk Ade, hal ieu saenyana kawenangan provinsi, najan kitu inyana miharep bongbolongan. "Simkuring miharep Pak Bupati tiasa masihan bongbolongan kumaha cara ngantisipasina," ceuk Ade Muhyi di kantorna, Kemis 7 Desember 2023.
Ade Muhyi nyonteokeun, balukar tanggul Walungan Cibeureum di desa tatangga, Desa Cigondewah Hilir, jebol, pamukiman di 5 RW di Desa Mekarrahayu, kacaahan.*** Sopandi