GALURA.CO.ID -Legislator Fraksi Gerindra DPRD Kabupaten Bandung, Ir. Aep Dedi ngaku moal eureun ngusulkeun program ngomean rumah teu layak huni (Rutilahu) sangkan karasa magpaatna ku masarakat.
Ceuk ieu anggota Komisi C DPRD Kabupaten Bandung, dina Rencana Pembangunan Jangka Menengah Daerah (RPJMD) 2021-2026 dina waktu lima taun Disperkimtan nargètkeun ngomean 35 rèbu rutilahu.
Tina total target sakitu, Disperkimtan ngarèalisasikeun sataunna ngomean 7000-an Rutilahu.
Ceuk Aep Dedi, imah tèh kabutuhan dasar masarakat. Ku kituna program Rutilahu jadi hal nu penting. Inyana malahan ngaku ku kawenanganana anggota DPRD geus ngawujudkeun ampir 100 Rutilahu di Dapil 2.
“Rutilahu tèh sumber anggaranana aya ti pamarèntah pusat, provinsi sareng ti kabupaten. Simkuring ngapresiasi program Disperkimtan, tur teras ngadorong program Rutilahu," pokna.
"Simkuring moal liren kana ngadorong program Rutilahu Margi karaos mangpaatna ku masarakat ” ceuk Aep Dedi, dina hiji acara di Dayeuhkolot, Rebo 15 Nopember 2023 peuting. *** Sopandi