Network
GALURA.CO.ID. – Publikasi miara titinggal budaya dina wangun film dokumenter digelar ku Balai Pelestarian Kebudayaan Wilayah IX Provinsi Jawa Barat, di Hotel Horison, Jalan Pelajar Pejuang, Kota Bandung, Senén, 13 November 2023.
Nyoko kana salasahiji tugas jeung fungsina, Balai Pelestarian Kebudayaan Wilayah IX Jawa Barat téh méh unggal taun mroduksi film dokumenter ngeunaan kabeungharan titinggal budaya, nu rata-rata durasina 25 menit.
Tah, sabadana mroduksi film dokumenter budaya téa, laju Balai Pelestarian Kebudayaan Wilayah IX Jawa Barat ngayakeun kagiatan Publikasi Warisan Budaya geusan nyawalakeun éta pidangan film dokumenter, nu diiluan ku parapelajar, akademisi, wawakil instansi nu ngokolakeun seni budaya, komunitas, pegiat budaya, praktisi film, katut ondangan séjénna.
Demi harita nu disawalakeun téh nyaéta pidangan film dokumenter sual Empal Gentong Cirebon, Panahan Kasumedangan, Batik Sukapura, Gedong Cagar Budaya di Bandung, sarta Permainan Tradisional.
Anapon nu jadi panelisna nyaéta antropolog Universitas Padjadjaran (Unpad) Ade Makmur jeung Andang Iskandar ti Institut Seni Budaya Indonesia (ISBI) Bandung.
Baca Juga: Tatanen di Urang Sunda, Ngahuma, Henteu Ngarobah Taneuh
Kepala Balai Pelestarian Kebudayaan Wilayah IX Provinsi Jawa Barat, Dwi Ratna Nurhajarini, mertélakeun, film dokumenter kalintang pentingna minangka media pikeun miara titinggal kabeungharan budaya.
Ku ayana éta pirang-pirang film dokumenter budaya, dipiharep bakal terus kajaga kalumangsungan proses miara titinggal budaya malar sakumna entragan teu leungiteun obor kalawan ngamangpaatkeun teknologi tur aweuhan informasina gé bisa salega-legana.
“Éta kagiatan Publikasi Warisan Budaya téh luyu jeung salasahiji tugas fungsi Balai Pelestarian Kebudayaan, nyaéta ngalaksanakeun dokumentasi cagar budaya, objek nu dianggap cagar budaya, jeung objek pemajuan kabudayaan. Tah, malar éta film dokumenter matak narik ati, dina proses ngagarapna téh ngalibetkeun praktisi film,” ceuk Dwi Ratna Harjarini.
Sajeroning kitu, antropolog Ade Makmur ngécéskeun, najan kasebutna film dokumenter budaya, dipiharep dina pidanganana téh sing matak mincut.
Pidangan dina wanda film dokumenter, tangtu baé kudu bari ditarékahan ku ayana visual nu teu pikaboseneun.
Lian ti éta, enas-enasna ajén pidangan éta film dokumenter gé sing enya-enya tepi ka ngahontal kana maksud tujuanana, nyaéta ayana kalumangsungan proses miara titinggal budaya karuhun keur cecekelan entragan satuluyna.
“Ku kituna, copélna dina film dokumenter téh sing bisa mibanda palasapah opat A, nyaéta atensi, agitasi, aktivitas, katut aksi. Ti dinya laju ngabeungkeut kana internalisasi ngahudang kasadaran kolektif pikeun miara éta titinggal budaya,” pokna.
Baca Juga: Galura Cetak III November 2023, Ngaguar Pentingna Ngungkab Bukanagara di Cisalak Kabupaten Subang
Sedengkeun Andang Iskandar ngébréhkeun, film-film dokumenter nu kapidangkeun harita téh gurat badagna mah geus némbongkeun materi-materi informasi nu dipikabutuh ku masarakat.
Ngan nu kudu leuwih dibebenah deui téh nyaéta nu patali jeung bab sinematografi, samodel plot carita, framing, pencahayaan, angle gambar, slot adegan, ilustrasi musik, jeung sajabana.
“Pangna kitu, sabab pidangan visual mah, sok komo kangaranan film dokumenter budaya saenyana gé bisa diigelan sangkan tetep mincut dilalajoanan. Aya adumanis antara materi informasi jeung sinematografi nu narik ati,” ceuk Andang Iskandar.
Salasaurang peserta, Rosyid E. Abby, jurnalis nu ogé aktivis Forum Film Bandung (FFB) boga kamandang, film dokumenter saenyana bisa tetep narik ati dilalajoanan, salasahijina ku cara midangkeun film semidokumenter atawa film dokudrama.
“Sok sanajan film dokumenter, bisa dipidangkeun dina wanda features, oge bari aya plot carita nu mucunghulkeun konflik carita, éta bakal jadi ngahudang atensi nu lalajo. Lian ti éta, hususon keur panelis, ka hareupna, aya hadéna ngondang ogé ti praktisi film atawa sineas, sangkan ngabeungharan wawasan perkara ngagarap film dokumenter,” pokna.***
Baca Juga: Jaman Pajajaran, Angklung kungsi Dipake Musik Perang
