GALURA.CO.ID –Pikeun ngawujudkeun pamarentah nu beresih, teu korupsi, teu kolusi jeung teu nepotisme, Bupati Ciamis ngaluarkeun Keputusan Bupati Ciamis Nomor 900.1.3.10/KPTS.480-HUK/Tahun 2023 tanggal 12 September Tahun 2023.
Keputusan Bupati Ciamis bieu teh ngeunaan Penetapan Wajib Lapor Harta Kekayaan bagi Pejabat yang Memangku Jabatan Strategis dan Potensial atau Rawan Kolusi, Korupsi, dan Nepotisme (KKN) di Lingkungan Pemkab Ciamis.
Pejabat anu potensial atawa rawan KKN teh salasahijina kepala desa atawa kuwu. Nu matak, Senen, 16 Oktober 2023, parakepala desa sakabupaten Ciamis diangkir miluan sosialisasi Keputusan Bupatu Ciamis jeung surat edaran KPK ngeunaan Laporan Harta Kekayaan Pejabat Negara (LHKPN).
Sosialisasi tempatna di Aula Inspektorat Kabupaten Ciamis, Jalan Mr.Iwa Sumantri No 4 Kertasari, Kecamatan Ciamis, Kabupaten Ciamis. “Ieu sosialisasi lengkah munggaran ngawajibkeun LHKPN ka para kepala desa sa-Kabupaten Ciamis,” ceuk Kepala Inspektorat Kabupaten Ciamis Drs. Syarip Nurhidayat, M.Si
Syarip Nurhidayat nyebutkeun taun 2023, sakabeh kepala desa di Ciamis ngirimkeun LHKPN ka KPK. Dipiharep pamarentahan nu beresih, bebas tina KKN ngawujud sagemblengna di Kabupaten Ciamis.
Dina sosialisasi bieu, Kepala Dinas DPMD Ciamis Ape Ruswandana S.P, Kepala Bagian Organisasi Setda Kabupaten Ciamis Hj.Tete Tejaningsih SE.,MM, milu ngaluuhan.***