GALURA.CO.ID- Calon anggota legislatif (Caleg) DPRD Kabupaten Bandung Vanya Vibilla Andjani, S.I.Pol, balaka, minangka caleg ti entragan ngora, dina nyosialisasikeun dirina bèda jeung calon-calon sèjèn.
"Simkuring teu fokus teuing masang spanduk ku margi simkuring turun langsung ka masarakat. Basa gaulna mah bubulusukan panginten. Simkuring fokus ka titik-titik nu teu acan kacagap ku calon sanèsna, " ceuk Vanya.
Vanya kalayan parteyna PDI P, tarung di Dapil 1 teh nyarita kitu waktu ngaluuhan manaqip, pangajian rutin di Pondok Pesantren Hidayatul Hikmah, Desa Gajahmekar, RT 04/11, Kecamatan Kutawaringin, Kabupaten Bandung, Salasa (26/9/2023) peuting.
Vanya nyebutkeun bubulusukan lain ukur nyosialisasikeun husus pencalonan dirina, tapi ngaedukasi ka masarakat politik danget tong dianggap kotor.
"Masih aya calon-calon anyar nu kompetensina hade tur kredibel. Simkuring, entragan ngora hoyong ngicalkeun pola-pola pikir pulitik tèh kotor, pulitik tèh pragmatis, " pokna.
Ieu wanoja nu digumelarkeun di Bandung teh balaka pihakna turun ngageuing masarakat ngeunaan pulitik henteu kotor.
Baca Juga: Ti Eryanti Glory Margahayu Motif Batik Kina Bandung Bedas
Ceuk Vanya, mun geus kacatet di Daftar Calon Tetap (DCT) inyana lain ukur bubulusukan tapi masang baligo.