Network
GALURA.CO.ID - Bandung H.M. Dadang Supriatna ngararancang Bulan Gebyar Lubang Cerdas Organik (LCO) salila sabulan, ti poè Senèn, 25 September tepi ka Rebo, 25 Oktober 2023.
Dina sabulan èta dieusi ku kagiatan rampak nyieun LCO/Lubang Resapan Biopori (LRB) di wewengkon sèwang-sèwangan. Ieu kagiatan minangka lèngkah ngokolakeun runtah organik jeung konservasi sumber daya cai.
Bupati Bandung ngintruksikeun ka para perangkat daerah, camat, kepala desa, lurah, katut komponen sèjènna di Kabupaten Bandung sangkan guyub dina gerakan LCO.
"Ieu tèh minangka tarèkah dina ngadalian parobahan iklim, konservasi sumber.daya alam, turta keur ngokolakeun runtah minangka edukasi lingkungan," ceuk Bupati Bandung.
Bupati Bandung meredih sangkan sakumna nu diinstruksian tadi aub langsung boh secara pribadi boh institusi.
"Prinsipna sasuhunan ngadamel sakirangna dua LCO/LRB, nyaèta liang silindris vertikal ka jero taneuh, diameterna 10-30 senti, jerona kana 100 senti atanapi teu ngalangkungan jerona beungeut cai taneuh. Liang dieusian runtah organik kanggo kabentukna biopori, " ceuk Dadang Supriatna.
LCO/LRB ieu ceuk Bupati Bandung dimangpaatkeun jadi sarana ngokolakeun runtah organik jeung sangkan cai gancang nyerep.
.
LCO/LRB bisa dijieun di pakarangan imah atawa lokasi sèjèn nu ngamungknkeun. Nyieun LCO/LRB bisa ngagunakeun alat bor biopori, linggis, atawa alat sèjènna.*** Sopandi
