Network
GALURA – Sakur jalma di alam dunya pasti mibanda udagan kasuksesan dina kahirupanana.
Teu saeutik jalma nu mikahayang sukses téh hanjakalna ukur museur kana nu sipatna duniawi.
Padahal ukuran kasuksesan téh lain waé perkara harta, jabatan, katut bagbagan séjénna nu kahontal sampurna.
Anapon ceuk ajaran Islam, jalma nu sukses téh nyaeta jalma nu meunangkeun kauntungan atawa katelah Al Muflihun.
Ku kituna, ceuk sesepuh Ponpes Roudlotul Ulum, Cisasawi, Désa Cihanjuang, Kabupaten Bandung Barat, KH Ubaidillah AB, maranéhanana nu meunangkeun kauntungan téh nyaéta jalma-jalma nu jadi hamba Allah kalawan sahadé-hadéna.
Baca Juga: Galura Cetak I September 2023, Ngaguar Live Streaming Wayang Golek jeung Wayang Kulit
Dina laku lampah maranéhanana sapopoéna, teu weléh ngeusi waktuna ku ibadah sarta usaha pikeun meunangkeun rido jeung kanyaah ti Allah SWT.
Ciri-ciri jalma nu sukses téh antarana maranéhanana nu ti awal tepi ka ahir kahirupanana pengkuh tur taat dina ngajalankeun paréntah Allah, katut teu weléh muntang jeung sumerah ka Nu Kawasa.
“Sing saha nu ti awalna geus caang ku katawakalan bari tetep sumerah ka Nu Kawasa, insyaallah dina ahir kahirupanana gé baris dicaangan ku cahaya Ilahi,” ceuk KH Ubaidillah, Jumaah, 25 Agustus 2023.
Dina Qur’an Surah Al Imran ayat 104, Allah SWT ngadawuh, “Di antara maraneh téh aya sagolongan jalma nu umajak kana kahadéan, nanjeurkeun nu ma’ruf, tur nyegah tina kamungkaran. Eta maranéhanana saéstuna jalma-jalma nu meunang kauntungan.”
Satuluyna KH Ubadillah AB ge mertélakeun, jalma nu sukses téh nyaéta jalma nu taat ka Allah SWT jeung ngalaksanakeun tuladan Rasulullah.
Eta sakumaha nu kaunggel dina Qur’an Surah An Nur ayat 51, “Ukur kocap urang-urang mu’min, nu mun diajak muntang ka Allah jeung Rosul-Na sabot mutuskeun perkara di antara maranéhanana, maranéhanana laju pok, ‘Kami ngareungeu, jeung kami taat.’ Saéstuna maranehanana téh jalma nu meunang kauntungan.”
Di sagédéngeun éta, numutkeun katerangan Ibnu Mas’ud, méh sagala di dunya téh eusina kabingungan jeung kasusah. Mun téa mah aya jalma nu meunang kabagjaan sarta kasenangan, éta téh minangka bonus ti Allah SWT.
“Ku kituna, geus sakuduna urang kudu terus sukuran ka Allah SWT. Sing saha jalma nu teu weléh sukuran kana ni’mat Nu Kawasa, bakal ditikelkeun éta ni’mat ku Allah SWT. Atuh pikeun nu teu sukuran, nya bakal dileungitkeun kani’matananana,” ceuk KH Ubadillah AB.
Ciri séjénna minangka jalma sukses dunya ahérat téh nyaéta jalma nu bisa ngadalikeun hawa nafsu.
“Sosobatan jeung jalma nu bodo tapi mampuh ngadalikeun hawa nafsu, éta leuwih hadé batan sosobatan jeung jalma alim tapi sok nganteurkeun kana hawa nafsu,” pokna deui.
Laju KH Ubaidillah AB mertélakeun, jalma teu weléh miduli ka sasama gé éta minangka golongan jalma sukses nu meunang kauntungan mungguh Allah SWT.
Jalma-jalma mu’min nu suksés bakal terus miduli ka papada jalma, boh ka dulurna boh ka sabudeureunana, ku cara sidkoh.
“Muga waé urang sadaya kaasup jalma-jalma nu sukses mungguh Allah SWT, kalawan tetep pengkuh tur taat kana paréntah-Na. Sukses dina harti ngahontal kasuksesan dunya jeung ahérat, nyaéta jalma-jalma nu meunang kauntungan ti Allah SWT,” ceuk KH Ubaidillah AB.***
Baca Juga: PKM FISIP Unpas Bandung Ngarojong Kamekaran Rumah Madu di Cihanjuang KBB
