Network
GALURA- Kepala Diskominfo Kabupaten Bandung, H. Yosep Nugraha, ngusulkeun Kelompok Informasi Masyarakat Tarumajaya (KIM Tarumajaya), Desa Tarumajaya, Kecamatan Kertasari, Kabupaten Bandung ngawakilan Jawa Barat dina KIMFest Nasional 2023 nu nu digelar Kementerian Komunikasi dan Informatika RI (Kominfo), 27-29 Oktober 2023 engkè.
Kepala Diskominfo Kabupaten Bandung nyebutkeun KIM Tarumajaya geus jadi KIM mandiri nu teu ukur aktip ngapublikasikeun informasi ngeunaan kagiatan desa, tapi ogè aktip dina ngaronjatkeun literasi masarakat sangkan jadi masarakat mu mandiri. Tina kituna payus jadi wawakil Jawa Barat dina KIMFest Nasional 2023.
Ceuk Kepala Diskominfo Kabupaten Bandung, media nu dimangpatkeun KIM Tarumajaya di antarana Instagram, Facebook, Youtube, jeung website desawisatatarumajaya.com. Maneuh ngapungkeun konten-konten kagiatan tur potensi desa dijieun jeung dikokolakeun ku KIM Tarumajaya sacara mandiri. Eta sababna merenah pisan mun miluan KIMFest Nasional 2023 ngawakilan Jawa Barat.
"Diskominfo ukur ngalatih kumaha cara ngedit, ngokolakeun informasi dugi ka janten konten. Salangkungna arinyana nu ngamekarkeun nyalira. Upami KIM tos tiasa mandiri, nya badè nguntungkeun masarakatna, margi KIM baris janten modal jaringan informasi antawis masarakat, pamaréntah, sareng pihak sanès,” ceuk Yosep.
Deny Sonjaya, Ketua Forum Komunikasi KIM (FK-KIM) Provinsi Jawa Barat nyatujuan usulan bieu. Inyana nyebutkeun KIM Tarumajaya geus nyumponan kriteria jang matandang di tingkat nasional.
Wakil Ketua KIM Tarumajaya, Uus Kusmana nètèlakeun, KIM kudu sarwa bisa. "Simkuring saparakanca kedah seueur diajar sareng tataros. Praktek diaping kuuniversitas sareng sakola-sakola luhur, supados tiasa masihan informasi nu sae sareng ngaèdukasi masarakat,” pokna.*** Sopandi
