Network
GALURA –Galura cetak edisi III Juni 2023, medal Rebo 14 Juni 2023, dina head line-na ngabahas ngeunaan pentingna Astana Gede Kawali pikeun ngungkab sejarah jeung peradaban di Nusantara, babakuna di Jawa Barat. Astana Gede Kawali payus pisan mun dijadikeun ekomuseum.
Dina Galura cetak edisi III Juni 2023, disebutkeun Astana Gede Kawali nyumponan syarat keur dijadikeun ekomuseum. Ieu situs budaya nu pernahna di Kabupaten Ciamis nu tanggal 12 Juni mieling pindahna puseur dayeuh Kabupaten Galuh teh mibanda titinggal jaman prasejarah, klasik jeung jaman Islam.
Galura cetak edisi III Juni 2023 nyindekeun Astana Gede Kawali leuwih ti nyumponan syarat pikeun dijadikeun ekomuseum. Astana Gede Kawali mibanda 6 prasasti, salasahiji prasastina amanat sangkan urang salilana nyieun kahadean. Lelewekna kaasup hutan lindung nu legana kurang leuwih lima hektar.
Baca Juga: Disdik Ngagumebyarkeun Kirab Budaya jeung Pawai Pembangunan Hari Jadi ka 533 Kabupaten Majalengka
Anu disebut ecomuseum teh museum nu fokusna kana identitas hiji tempat. Identitas nyoko kana kabudayaan dina harti nu leuwih lega, kaasup sejarah. Di dieu aya partisipasi lokal sarta tujuanana keur karaharjaan jeung mekarkeun masarakat.
Dina ecomuseum henteu penting bangunan keur neundeun benda cagar budaya, lantaran cagar budaya aya di alam, saperti nu aya di Astana Gede Kawali. Mun tea mah dipamerkeun benda cagar budaya ukur keur ngeuyeuban.
Istilah ecomuseum asalna Prancis. Konsepna dikembang ku Georges Henri Rivière jeung Hugues de Varine taun 1971. Dina basa Perancis mah ecomusée. Eco tina kecap écologie. Tina kituna ekomuseum ngaruju kana interpretasi holistik warisan budaya, beda jeung museum tradisional nu ngan ukur mamerkeun benda cagar budaya.
Tulisan sejenna dina Galura cetak edisi III Juni 2023, rubrik Warna-Warni, ngaguar ngeunaan lauk layur di Palabuanratu Sukabumi nu naek kelas. Tadina hargana murah, ngan sanggeus dibeulian ku urang Jepang, hargana jadi mahal. Ayeuna mah hese mun hayang meuli lauk layur teh.
