GALURA.CO.ID - Bupati Bandung, Dadang Supriatna, ngaresmikeun layanan anyar jeung Ground Breaking Gedung Unit Transfusi Darah Rumah Sakit (UTDRS) di Rumah Sakit Umum Daerah (RSUD) Oto Iskandar Di Nata, Soreang, Salasa, 23 April 2024.
Dadang Supriatna dibarengani Direktur RSUD Oto Iskandar Di Nata, dr. Yani Sumpena jeung rèngrèngan Organisasi Perangkat Daerah Kabupaten Bandung sèjènna.
Dadang Supriatna nyebutkeun, taun kamari pihakna heus meuli mesin cathlab. " Ieu salah sawios trèkah supados tiasa ngalayanan masarakat, nu alat kesehatan ieu kawates. Boh kanggo palayanan pangungkulan panyawat jantung sareng pembuluh darah boh nu sanèsna," pokna.
Mesin cathlab ceuk Dadang Supriatna, bisa dikembangkeun jang Digital Substraction Angiography (DSA). Nyaèta prosedur kadokteran pikeun nitènan struktur pembuluh darah di otak, hususna dina lebah sirsh jeung beuheung. Pameriksaan invasive ngagunakeun mesin cathlab.
"Mung aya genep urang dokter spesialis jantung anak di Jawa Barat nu tiasa nganggo cathlab dina pangobatanana," ceuk Dadang.
Ku aya ieu alat, ceuk Dadang Supriatna, bisa ngurangan angka pasien nu ngarandapan kasakit jantung bawaan budak, tepi ka bisa diungiulan dii RSUD Otista Kabupaten Bandung.
Dadamg Supriatna nètèlakeun, ayeuna RSUD Otista ogè geus gawè bareng jeung pangayaan husus keur transfusi darah ku mimiti dilaksanakanana ground breaking unit layanan jang transfusi darah.
Sawatara taun samèmèhna, ceuk Dadang Supriatna, saban ngabutuhkeun getih, pasti ka PMI (Palang Merah Indonesia). Bupati miharep ku unit pangolahan transfusi darah nu aya di RSUD Otista bisa nyumponan kakurangan getih di Kabupaten Bandung.
Dadang Supriatna ogè nepikeun di lingkungan RSUD Otista ogè nyadiakeun klinik eksekutif. "Ngahaja dihadirkkeun kumargi gaya hirup masarakat sareng kabutuhan kasehatan kalintang penting. Kumargi kitu aya sababaraha lokasi kanggo para pasien eksekutif di RSUD Otista, " pokna.
Bupati miharep ku ayana sababaraha tambahan layanan anyar di RSUD Otista bisa leuwih mèrè panglayan kesehatan nu alus ka masarakat di Kabupaten Bandung.
"Di RSUD Otista ogè aya panglayanan pangungkulan kanker. Teu kedah ka Rumah Sakit Hasan Sadikin (RSHS) Bandung atanapi ka Jakarta. Alhamdulillah di Kabupaten Bandung ogè tos aya fasilitas kasehatan kanggo ngabantos para pasien nu gaduh panyawat kanker," ceuk Bupati Bedas teh. *** Sopandi