Network
Dikitukeun ku Profésor Kabayan, jep baé Sangkuriang jempé.
"Tanah Sunda? Di mana Tanah Sunda téh?"
"Jauh temen ti dieu mah. Ieu téh Nagri Yunani, nya?" Profésor Kabayan malik nanya.
"Enya. Teu salah!"
"Ké, ari andika saha téa?"
"Tong waka loba tatanya, ari andika can nerangkeun saha andika mah! Jeungna deui, ku naon arandika bet wani-wani ganggu ka kaula anu wawuh gé kakara ayeuna, di dieu pisan?!" omong Oidipus teugeug deui baé.
"Hadé atuh ari kitu mah," ceuk Profésor Kabayan bari tuluy méré isarah ka Sangkuriang, ngajak ngadeukeutan Oidipus.
Oidipus geuwat taki-taki, bisi pihak itu narajang.
Nya kitu deui Sangkuriang, sarua masang jurus.
Nénjo pamolah Oidipus anu kitu peta, éstu waspada kabina-bina, Profésor Kabayan ukur nyéréngéh. Tuluy ngiceupan ka Sangkuriang anu sarua waspadana jeung Oidipus.
