Network
Abah Naton nyebutkeun, pihak kecamatan, Kasie Sosbud, mèrè katerangan data seniman nu boga hak narima tèh geus ditangtukeun ku pihak Disbudpar tur teu bisa diirobah di tingkat kecamatan lantaran bakal ngarobah jumlah paket nu baris ditarima.
Ceuk Abah Anton, kaayaan kieu tèh ampir kajadian di sakum kecamatan. Loba salah data nu nanarima teu luyu jeung nu diamanatkeun bupati: paket bantuan nu 15.000 ieu jang seniman jeung budayawan.
"Kecamatan Cimenyan sareng Cileunyi kalebet nu seueur lepat sasaran kumargi data-data nu dipasihkeun ku Disbudpar teu luyu sareng fakta di lapangan. Malihan laporan ti Korcam Pasebban Cimenyan mah aya sa-desa mung kenging 1 paket, padahal Kecamatan Cimenyan, Cilengkrang sareng Cileunyi kalebet daerah nu kalintang seueur komunitas senimanna, " ceuk Abah Anton.
Lantaran kasalahan data dinas ceuk Abah Anton tepi ka kajadian teu saeutik seniman nu pundung bari meupeus keuyang ka para pangurus Pasebban di tingkat desa jeung kecamatan.
"Samalah di antarana aya nu janten papasèaan nu sakedahna teu kajantenan upami ti kawitna pamarèntah tatarosheula perkawis data para seniman sareng budayawan," pokna.
Baca Juga: Kinanti, Olahraga jeung Seni Ibing Penca Silat
Ceuk Abah Anton, para Ketua Korcam Pasebban manghanjakalkeun naha Disbudpar ngaluarkeun daftar para seniman budayawan teu kordinasi heula jeung Pasebban.
"Padahal nu terang kagiatan sadidinten seniman aktif atanapi henteuna nya kedah naros ka seniman. Palebah dieu kordinasi sareng Pasebban, " pokna.
Ceuk Anton, mun seug kordinasi dilakukeun pasti ngurangan pasualan di lapangan waktu ngadistribusikeun. "Ayeuna seueur para seniman nu kuciwa ka pamarèntah hususna ka bupati, kumargi dianggap ingkar jangji, " pokna.
Can meunang katerangan ti pihak Disbudpar Kabupaten Bandung basa nyoba nelepon , Salasa , 9 April 2024 sorè.*** Sopandi
