Network
GALURA.CO.ID - Ti Juma'ah 1 tepi tepi ka Ahad 3 Maret 2024, KPU Kabupaten Bandung ngagelar Rapat Pleno Rekapitulasi Hasil Penghitungan Perolehan Suara Pemilu 2024 di Tingkat Kabupaten Bandung di Hotel Sutan Raja Soreang, Kabupaten Bandung.
Ketua KPU Kabupaten Bandung, Syam Zmiat nètèlakeun pleno di KPU Kabupaten pikeun macakeun hasil ti tingkat kecamatan.
"Hasil di kecamatan bakal dibacakeun sasarengan nu engkèna disandingkeun sareng hasil upload Sirekap," pokna.
Baca Juga: Kapolsek Sukahaji jeung Danramil Sukahaji Ngaluuhan Rapat Pleno Rekapitulasi Soara Pemilu 2024
Syam nyebutkeun sakuduna kabeh data atawa rekapan nu geus ditandatangan ku saksi di tingkat kecamatan, kumaha waè kaayaanana geus rèngsè di tingkat kecamatan.
"Namung, upami masih aya saksi nu hadir di dieu masih kèneh aya nu teu acan sugema sareng nganggap aya ètangan nu dianggap teu luyu, hayu urang rèngsèkeun di dieu, " ceuk Syam ngajèntrekeun.
Syam Zamiat ngaku, pihakna geus jangji hasil pangitungan di tingkat TPS baris dikawal jeung diamankeun tepi ka di panghitungan tingkat nasional.
Poè munggaran, ceuk Syam dibuka dua panel, ngainput data nu dibacakeun Ketua PPK di tingkat kecamatan sèwang-sèwang, pikeun 11 kecamatan. Sesana isukna 20 kecamatan. *** Sopandi
