Network
GALURA.CO.ID. – Turnamen Astrajingga Ju-Jitsu Open Championship (AJJOC) 2023 digelar minangka pakalangan geusan ngagumelarkeun atlet-atlet Ju-Jitsu pinunjul.
Ieu turnamen AJJOC 2023 nu dipokalan ku Pengurus Besar Ju-Jitsu Indonesia (PBJI) Kota Bandung teh oge boga tujuan keur ngalegaan aweuhan cabang olahraga Ju-Jitsu ka sakumna kalangan masarakat.
Ku ayana turnamen nu lumangsung noron, samodel AJJOC 2023, dipiharep mingkin mucunghulna atlet-atlet Ju-Jitsu, boh minangka wawakil kleub boh wawakil perguruan, atawa daerah, enggoning nyanghareupan rupaning turnamen di tingkat nasional tur internasional.
Dina ngagelar turnamen AJJOC 2023 ge PBJI Kota Bandung miboga udagan jadi salasahiji barometer katut bahan evaluasi pembinaan dina ihtiar ngahontal prestasi sahade-hadena turta malar regenerasi atlet Ju-Jitsu bisa tetep kajaga jeung ngaronjat.
Kalawan tema Spirit Kolaborasi Untuk Menunjang Prestasi Unggul, AJJOC 2023 teh bakal digelar ping 16-17 Desember 2023 di GOR Bulutangkis KONI Kota Bandung, Jl. Jakarta No. 18, Kota Bandung.
Baca Juga: Ditetepkeun di Paris, Bahasa Indonesia Jadi Basa Resmi Konferensi Umum UNESCO
Demi nu jadi maskot atawa logo AJJOC 2023 nyaeta Si Cepot, tokoh dina carita wayang golek nu geus loma tur jadi kareueus urang Sunda jeung Jawa Barat. Ieu turnamen sipatna terbuka pikeun kleub atawa perguruan.
PBJI Kota Bandung nargetkeun nu makalangan dina AJJOC 2023 teh bisa tepi ka 300-400 atlet Ju-Jitsu ti sakuliah daerah di Indonesia, pikeun marebutkeun Piala Ketua Umum PBJI Kota Bandung.
Parapeserta AJJOC 2023 ti mimiti umur 7 taun tepi ka 34 taun leuwih, boh putra boh putri, ngawengku kelas anak, junior, senior, katut pikeun master, kalawan beurat awakna teh ti 21 kg tepi ka 76 kg.
Maranehanana aya nu tanding dina kategori Newaza, Show System, jeung Fighting System.
Tina ieu turnamen nu boga tujuan leuwih ngawanohkeun cabang olahraga Ju-Jitsu ka kalangan masarakat teh, oge notog kana perkara standar palaksanaan pertandingan Ju-Jitsu.
Baca Juga: Pangna Gamelan Sekatén Cirebon Ditabeuhna Sataun Dua Kali
Teu tinggaleun, sing bisa ngawujudkeun pola pembinaan Ju-Jitsu nu kaintegrasi kalawan ngaubkeun kolaborasi sakumna pihak enggoning ngagumelarkeun atlet Ju-Jitsu pinunjul nu nyambuangkeun ngaran daerah katut nagara.
Bibit-bibit unggul nu dihasilkeun tina digelarna AJJOC 2023 teh dipiharep jadi atlet nu tanggoh, sarta kahareupna mingkin ngaronjat prestasina.
Nilik kana kamekaran potensi jeung eksistensi Ju-Jitsu di Indonesia, PBJI Kota Bandung dina ngagelar AJJOC 2023 teh diwangun dina wanda barometer standar internasional.
Ku kituna dipiharep, AJJOC 2023 ge bisa jadi pamuka lawang-lolongkrang pikeun sakabehna atlet Ju-Jitsu geusan ngahontal prestasi kalawan diwewegan ku rekomendasi sertifikasi turnamen hasil rukun gawe jeung sakumna pihak, tur makalangan di tingkat nasional jeung internasional. ***
