Network
GALURA.CO.ID. - Menteri Koperasi dan UKM Teten Masduki reujeung Ketua Umum PWI Pusat Hendry Ch Bangun katut Ketua Dewan Pers Ninik Rahayu jalan santai ti Silang Monas tepi ka Sarinah bulak-balik. Saanjogna di Sarinah, para peserta jalan santai anu diiluan ku ratusan anggota PWI reujeung masarakat ngabébérkeun spanduk tanda dimimitianana launching Hari Pers Nasional (HPN) 2024. Éta spanduk ditulisan "Mengawal Transisi Kepemimpinan Nasional dan Keutuhan Bangsa”.
Éta acara jalan santai téh dihadiran ogé ku pangurus PWI jeung pingpinan redaksi media massa, di antarana Sekjen Sayid Iskandarsyah, Wasekjen Raja Pane, katut Ketua Panpel HPN 2024 Marthen Slamet Susanto.
Salian ti éta, mitra-mitra PWI ogé hadir, di antarana Kabid Humas Polda Metro Jaya Kombes Pol Trunoyudo Wisnu Andiko jeung Divisi Humas Mabes Polri Kombes Pol Ahmad Musthofa Kamal.
Baca Juga: Kemkominfo, Dewan Pers, jeung PWI Sapuk Ngarojong Jurnalisme nu Piunggul dina Pemilu 2024
Ketua Umum PWI Pusat Hendry Ch Bangun nétélakeun, éta launching (peluncuran) HPN 2024 di Silang Monas, Minggu, 12 November 2023 téh ngamimitian runtuyan kagiatan HPN 2024, anu puncakna baris dilaksanakeun di Taman Impian Jaya Ancol (TIJA), Jakarta, 9 Februari 2024 nu bakal datang. Dipiharep, Presiden Jokowi hadir dina acara puncak HPN, cenah.
“Diayakeunana launching HPN 2024 téh kanggo ngawanohkeun Hari Pers Nasional (HPN) ka masarakat nu langkung lega aweuhanana. Ku kituna, sim kuring umajak ka sakumna wartawan kanggo ngareuah-reuah acara,” ceuk Hendry Ch Bangun.
Ceuk Hendry, promosi HPN 2024 téh kudu terus digedurkeun, boh liwat warta (berita) dina media massa boh konten-konten di media sosial dina rupa-rupa platform, saperti YouTube, podcast, Twitter, Instagram, video pondok, live streaming, jeung sajabana.
Ketua Dewan Pers, Ninik Rahayu, nétélakeun, peluncuran HPN 2024 ogé pikeun ngawanohkeun ka masarakat sual peran pers dina ngawal transisi kapamingpinan nasional jeung ngajaga pemilu damai jeung keutuhan bangsa.
Baca Juga: Ngarah Pikasieuneun, Memeh Dipake Topeng Bebegig Sukamantri Ciamis, Sapeuting Ditunda di Pajaratan
"Démokrasi liwat pemilu ditangtoskeun ku peran pers sareng partisipasi masarakat. Ku kituna, hayu urang sasarengan ngajaga pemilu anu béres roés," pokna.
Menteri Koperasi dan UKM Teten Masduki ngaaprésiasi kana kagiatan HPN 2024 sarta miharep pers netral dina pemilu anu bakal datang.
Teten ngécéskeun, dina era media sosial (medsos) kiwari geus loba pisan runtah (hoaks, -Red) nu pabalatak. Nya di dieu pisan, cenah, pentingna peran pers ngasongkeun informasi anu mangpaat pikeun ngajaga keutuhan bangsa.
Acara launching HPN 2024 téh dina seuhseuhanana direuah-reuah ogé ku rupa-rupa hiburan anu diluuhan ku sakumna masarakat.***
Baca Juga: Kapanasaran Wartawan Korea ngeunaan Indonesia, ti Mimiti Layanan Cai tepi ka Isu Pulitik
