Network
GALURA.CO.ID. - Menteri Pendidikan, Kebudayaan, Riset dan Teknologi (Mendikbudristek) Nadiem Anwar Makarim nyaluyuan pameredih PWI pikeun nuluykeun program Sakolah Jurnalistik Indonesia (SJI) minangka tarékah ngaronjatkeun kompetensi wartawan. Dipiharep, program pelatihan SJI téh bisa dilaksanakeun deui taun 2024 kalayan rojongan anggaran ti Kemendikbudristek.
Kasaluyuan Mendikbud Nabiel Makarim sual SJI téh ditepikeun nalika nampa pangurus PWI Pusat anu dipupuhuan ku ketua umumna Hendry Ch Bangun. Dina éta gempungan, hadir ogé pangurus PWI lianna, Ketua Bidang Pendidikan M Nasir, Wasekjen Raja Pane, sarta sababaraha senior PWI katut pengajar SJI, Marah Sakti Siregar. Ti Kemendikbudristek, marengan Nadiem Makarim, di antarana Plt Kepala Biro Kerja Sama dan Hubungan Masyarakat Anang Ristanto, SE., MA jeung Sekretaris Ditjen Pendidikan Vokasi Saryadi Guyatno.
Nalika ngabagéakeun pangurus PWI Pusat di kantorna, Nadiem Makarim nétélakeun yén inyana geus teu ngarasa asing deui ka organisasi PWI sabab baheula kungsi dumuk di Kompleks PWI, Cipinang, Jakarta.
Bapana Nabiel Makarim téh, Nono Anwar Makarim, tokoh pers nasional jeung Pamingpin Redaksi Harian KAMI. Salaku wartawan jeung salasahiji tokoh Angkatan 66, Nono Anwar Makarim kacida maliréna kana masalah pendidikan wartawan.
Baca Juga: Kemkominfo, Dewan Pers, jeung PWI Sapuk Ngarojong Jurnalisme nu Piunggul dina Pemilu 2024
Sabada ngabandungan dadaran ti Ketum PWI Hendry Ch Bangun jeung pengajar SJI Marah Sakti, ieu Menteri nu leuwih resep disebut "Mas Mentri" téh, langsung méré respon positif.
Numutkeun Nadiem, SJI téh program pelatihan jurnalistik anu hadé, tur dilaksanakeunana ogé ku organisasi anu dipercaya, nyaéta PWI. Jadi, ceuk Mas Mentri, SJI kudu dituluykeun.
Saméméhna, Nadiem kungsi tatalék sual SJI, saha baé pesertana, sarta sabaraha lila program pelatihanna.
Ceuk Hendry, peserta SJI téh wartawan muda anu lilana pelatihan saminggu. Terus keur redaktur tilu poé, sarta wartawan utama sapoé. Ari para pangajarna mah tokoh-tokoh pers, wartawan senior pikeun nepakeun élmu jeung pangalamanana katut ajén-ajén perjuanganana.
"SJI téh program anu kalintang saéna. Ke urang usahakeun kanggo alokasi anggaranana supaya program SJI tiasa diteraskeun," ceuk Nadiem.
Kagiatan SJI dieureunkeun taun 2017/2018, di antarana ku lantaran macetna anggaran jeung ayana sasalad Covid-19. Saméméhna, kagiatan SJI dibiayaan ku anggaran ti Kemendikbud kalawan alokasi Rp 1 miliar. Tujuanana sangkan kompetensi wartawan bisa rata ka sakuliah daerah.
Baca Juga: Kapanasaran Wartawan Korea ngeunaan Indonesia, ti Mimiti Layanan Cai tepi ka Isu Pulitik
Tumali jeung pelatihan jurnalistik pikeun wartawan di daerah, Nadiem ngasongkeun sababaraha usulan anu bisa diluyukeun jeung kawijakan di Kemendikbudristek. Salasahijina nyaéta ngayakeun pelatihan jurnalistik sacara online sangkan bisa leuwih loba pesertana jeung leuwih murah.
"PWI ogé tiasa ngadamel mini kampus. Ieu téh ngadamel universitas, dibiayaan ku pamaréntah tapi tanpa ngadegkeun universitas. Teu kedah ngadegkeun wangunan. Anggo wé fasilitas nu aya. Ieu téh luyu sareng kawijakan Merdeka Belajar dan Kampus Merdeka (MBKM),” ceuk Nadiem.
Pikeun Program Kampus Merdeka, Kemendikbudristek nyadiakeun platform jeung anggaranana, mun seug PWI aya minat nyieun mini universitas. “Sual kurikulum, mangga, pengajar tiasa disiapkeun ku PWI,” ceuk ieu Mas Mentri deui.
Aya tawaran kitu ti Nadiem, pihak PWI mupakat, rék ngalajuninglaku éta gawé bareng jeung Kemendikbudristek, utamana anu patali jeung pemerataan kompetensi wartawan di daerah jeung kaperluan organisasi PWI.***
Baca Juga: Ngarah Pikasieuneun, Memeh Dipake Topeng Bebegig Sukamantri Ciamis, Sapeuting Ditunda di Pajaratan
