Network
GALURA.CO.ID –Jaman ayeuna aneh mun aya jalan desa nu masih keneh ruksak. Unggal taun desa dikucuruan dana ku pamarentah pusat, dana desa ku pamarentah provinsi jeung ku pamarentah kabupaten atawa kota. Tambah deui so kaya aspirasi ti anggota dewan jeung bantuan keuangan.
Warga desa nu jalan desana masih keneh dibalay ku batu jeung koral tacan ngambeu aspal atawa coran beton sok hareraneun: Kana naon wae dana desa dipakena. Mun teu wanieun nanyakeun ka desa atawa ka kuwu (kepala desa) sok protes ku cara sejen.
Di Kampung Babakan Desa Ciparigi, Kecamatan Sukadana, Kabupaten Ciamis aya jalan desa dingaranan Jalan Candi Aspal, ngaranna jalanna ditapelkeun dina tangkal kai di sisi jalan nu masih keneh dibalay ku batu, tacan diaspal atawa dicor.
Baca Juga: Nyangku, Bupati Ciamis Miharep Bisa Leuwih Ngirut Wisatawan Lokal jeung Mancanagara
Jalan nu tacan masih keneh dibalay ku batu teh, jalan pertelon nu mengkol ka pakarangan masjid jami. Ari jalan desa nu lempengna mah geus dicor beton ngembat panjang ti jalan kabupaten, ti Jalan Dipakusumah.
Kepala Desa Ciparigi, Warjo, basa dibejaan ku Galura bari ngirimkeun poto eta ngaran Jalan Candi Aspal nu dipoto poe Jumaah, tanggal 6 September 2023 nyebutkeun inyana rek nempo eta jalan.***
