Network
GALURA.CO.ID –Pengurus Kadin Kabupaten Ciamis periode 2023-2028, Kemis (07/09/2023) diistrenan di Gedung PKK Ciamis. Parapangurus lolobana entragan ngora, kaasup ketuana, Hari Adam.
Bupati Ciamis, Herdiat Sunarya, nembrakeun kareueusna pangurus Kadin Kabupaten Ciamis periode 2023-2028 lolobana entragan ngora. “Ieu hal luar biasa, Kadin (pengurus 2023-2028) dicangking ku para pamuda, pangusaha muda,” pokna.
Ceuk Bupati Ciamis, pamuda nu mibanda sumanget nu ngagalura, dipiharep bias kolaborasi babarengan hudang keur ngabangun Kabupaten Ciamis. “Potensi alam Tatar Galuh luar biasa pisan sarta kudu dimotekarkeun,” pokna.
Baca Juga: Bupati Ciamis: Pangwangunan Desa Udaganana keur Ngaronjatkeun Karaharjaan Masarakat
Bupati Ciamis nyebutkeun potensi nu dipibanda ku Kabpaten Ciamis teh di antarana kopi. “Alhamdulillah mindset SDM geus mimiti motekar. Bareto mah kopi teh sanggeus dipoe, dikurangan terus dijual. Ayeuna diolah dibungkus kalayan hade payus keur go internasional,” pokna.
Lian ti kopi, Kabupaten Ciamis oge daerah produk hayam daging pangbadagkan di Jawa Barat. “Tapi masih hayam hirup. Alus pisan mun hayam diolah jadi sosis atawa nugget jeung sabangsana tepi ka mibanda daya jual nu leuwih luhur,” pokna.
Saenyana masih keneh loba potensi Kabupaten Ciamis nu tacan ditolih, komo dimekarkeun mah. Di antarana lauk, pariwisata budaya. Tina kituna pamarentah Kabupaten Ciamis perlu daria dina ngamotekarkeunana, da ari kopi jeung hayam mah ti bareto oge geus jalan.***
