Network
GALURA,CO.ID- Pusat Edukasi Pengelolaan dan Pemanfaatan Sampah (PUSPA) nu ngolah runtah ku make panarekan RDF (Refused Derived Fuel) di Desa Jelekong, Kecamatan Baleendah, Kabupaten Bandung diresmikeun Bupati Bandung, Dadang Supriatna, Rebo (30/8/2023).
Make teknologi RDF, PUSPA ngolah runtah tepi ka jadi bahan bahan bakar turunan nu bisa dimangpaatkeun jadi sumber energi gaganti batu bara. Tina kituna, engkena di Kabupaten Bandung runtah henteu dipiceun ka Tempat Pembuangan Akhir (TPA).
Kabupaten Bandung mibanda 4 unit RDF di PUSPA Jelekong (2 unit), Citalitik (1 unit), jeung di TPST Cicukang (1 unit). Saban unit sapoena mampuh ngolah runtah tepi ka 25 ton. Ku 4 unit RDF, sapoena runtah nu diolah jadi sumber energi ngahontal 100 ton.
Baca Juga: Menko Marves Luhut: Runtah di Indonesia Sapoe Bisa Tepi ka 50.000 Ton
Dadang Supriatna nyebutkeun, Kabupaten Bandung ngahasilkeun runtah sapoena kana 1.300 ton. Tima sakitu tèh sanggeus dikokolakeun di tingkat desa sesana 350 ton. Sèsa runtah tuluy dikokolakeun ngagunakeun RDF, 100 ton, jadi masih aya sèsa 250 ton nu perlu diolah.
Taun hareup Pemda Bandung di PUSPA nambahan unit pangolahan runtah RDF. Dadang Supriatna nganuhunkeun ka pausahaan nu geus ngagunakeun RDF gaganfi batu bara.
Bupati Bandung hayang dina jangka waktu 2 taun ka hareup, Kabupaten Bandung hayang teu ngandelkeun TPA, sabab runtah geus dikokolakeun di tingkat daerah.
Kepala Dinas Lingkungan Hidup Kabupaten Bandung, Asep Kusumah nyebutkeun pentingna teknologi ngolah runtah nu titincakanana RDF. Ieu teh solusi inovatif dina ngokolakeun pasualan runtah.
Inyana miharep PUSPA jadi pusat ngolah runtah nu gampang jeung terus-terusan. PUSPA ogè ngarojong bank sampah di unggal desa nu ngaubetkeun kader B3S (Bandung Bedas Bersih Sampah) sangkan tarekah dina ngungkulan runtah leuwih karasa hasilna. *** Sopandi
