GALURA.CO.ID. - Komisi Penyiaran Indonesia Daerah (KPID) Jawa Barat rukun gawe jeung Keluarga Besar Forum Komunikasi Putra Putri Purnawirawan dan Putra Putri TNI/Polri (KB FKKPI) PC 10.28 Kabupaten Bandung Barat, ngagelar kagiatan Pembentukan dan Pembinaan Komunitas Pemantauan Isi Siaran (PIS) Jabar, Orientasi Dunia Penyiaran (Order) PIS Chapter KB FKPPI Kabupaten Bandung Barat.
Eta acara alpukahna KPID Jawa Barat kalawan ngaubkeun KB FKPPI PC 10.28 Kabupaten Bandung Barat teh lumangsung di Bumi Sunda, Desa Cihanjuang, Kacamatan Parongpong, Kabupaten Bandung Barat, Rebo, 24 April 2024.
Diiluan ku kira 50 urang anggota FKPPI ti sakuliah Kabupaten Bandung Barat, nu jadi panyaturna nyaeta anggota DPRD Jawa Barat Tobias Ginanjar, rengrengan KPID Jawa Barat, katut ti KPU Kabupaten Bandung Barat.
Minangka lembaga pangawasan penyiaran, KPID Jawa Barat boga peran penting geusan ngawujudkeun kaayaan masarakat nu cerdas.
Baca Juga: Sherly Kusuma, Bojo Ketua DPD PAN Majalengka, Daftar Jadi Cawabup Majalengka
Ku kituna, eusi siaran, boh nu midang dina TV boh dina radio, dipiharep sing enya-enya jadi tuntunan jeung tontonan nu ngadidik nu teu weleh boga udagan ngageuing kasadaran masarakat pikeun ngahontal kaayaan nu leuwih hade.
Ketua KPID Jawa Barat, Adiyana Slamet, ngeceskeun, di Jawa Barat kiwari aya kira 35 juta urang nu lalajo TV jeung nengetan siaran radio.
Dina ngalaksanakeun tugasna enggoning pangawasan siaran, tangtu wae KPID Jawa Barat perelu ayana rojongan ti sakumna unsur masarakat, tur rukun gawe jeung organisasi atawa komunitas masarakat.
“Keur ngahontal hasil maksimal, tangtu wae KPID teu bisa gawe sosoranganan. Dina Undang-Undang No. 32 taun 2002 ngeunaan Penyiaran, eces yen KPID kudu terus koordinasi jeung pamarentah, masarakat, oge jeung lembaga penyiaran," pokna.
Tah, eta amanat Undang-Undang teh ku KPID Jawa Barat salasahijina ku ngayakeun kagiatan Program Pengawasan Semesta nu dilarapkeun kana kagaitan Order PIS.
Baca Juga: Ketua F PKB DPR RI Muji ka Kabupaten Bandung dina Kapamingpinan Dadang Supriatna
“Dina ngalarapkeun kagiatan Order PIS tea, dina ieu kasempetan KPID Jawa Barat ngaubkeun KB FKPPI Bandung Barat minangka bagean tina unsur masarakat pikeun milu aktif enggoning pangawasan siaran malar eusi siaran tetep kajaga ajenna,” ceuk Adiyana Slamet.
Anapon Tobias Ginanjar ngebrehkeun, minangka saluran frekuensi nu aya di rohang publik, eusi siaran TV atawa radio teh ulah ieuh ukur dimangpaatkeun pikeun kapentingan hiji-dua kelompok katut golongan.
“Ku kituna, kalintang penting jeung strategisna ketak KPID Jawa Barat, kalawan ngaubkeun unsur masarakat, pikeun terus ngajaga ajen eusi siaran TV sarta radio, geusan ngawujudkeun masarakat nu cerdas,” pokna.
Sajeroning kitu, Ketua KB FKPPI PC 10.28 Kabupaten Bandung Barat, Gaston Barus, netelakeun, eta kagiatan teh minangka orientasi nu ngawewegan pangaweruh sakumna anggota FKPPI, utamana ngeunaan tugas-tugas KPID Jawa Barat nalika ngalakukeun pangawasan siaran.
Baca Juga: Islam jeung Sunda Gumulung Ngahudangkeun Kakuatan Tan Katingali
“Luyu jeung nu jadi harepan KPID Jawa Barat, KB FKPPI Bandung Barat ge teu weleh siap ngarojong kana kalancaran udagan tugas fungsi KPID kalawan babarengan ngalakukeun pangawasan eusi siaran malar teu mengpar tina ajen-inajen, ngawujudkeun eusi siaran nu enya-enya mangpaat keur balarea, ulah ukur keur kapentingan hiji-dua kelompok,” pok Gaston Barus.
Dina sesi dialog, komisioner KPID Jawa Barat, Elang Gantoni Malik, ngeceskeun, ieu acara Order PIS teh minangka kagiatan edukasi pikeun babarengan ngajaga jeung miara iklim penyiaran, boh TV boh radio, sangkan eusina mungguh mawa maslahat keur balarea.
“Kuring cumeluk, mun tea mah aya eusi siaran TV atawa radio nu dianggap teu uni, ulah asa-asa laporkeun wae ka KPID Jawa Barat,” pokna. ***