GALURA – Raja Dangdut, Rhoma Irama, nungkulan sidang nu netepkeun dangdut minangka Warisan Budaya Takbenda (WBTb) Indonesia taun 2023.
Lian ti Rhoma Irama, sangkan dangdut dijadikeun WBTb Indonesia téh, éta sidang dihadiran ogé ku penyanyi dangdut Cici Paramida.
Hadirna Rhoma Irama jeung Cici Paramida, éta téh minangka wujud pangrojong maranéhanana malar eksistensi dangdut mingkin lega aweuhanana kalawan meunang pangajén nu jadi bagéan tina warisan budaya Indonesia.
Dangdut diusulkeun ku Provinsi DKI Jakarta pikeun direkomendasikeun tur ditetepkeun minangka warisan budaya, dina Sidang Penetapan WBTb Indonesia 2023 nu digelar ku Kementerian Pendidikan Kebudayaan Riset dan Teknologi (Kemdikbudristek) RI, di Jakarta, 28 Agustus-1 September 2023.
Baca Juga: PRFM Nyangking Penghargaan Anugerah Penyiaran KPID Jabar 2023 Kategori ILM Pemilu
Ceuk Kepala Dinas Kebudayaan DKI Jakarta, Iwan Henry Wardhana, ku ditetepkeunana dangdut sangkan jadi WBTb Indonesia téh minangka tonggak sajarah pikeun DKI Jakarta geusan ngarawat kabeungharan budaya.
“Dinas Kebudayaan mibanda peran nu strategis pikeun ngajaga jeung miara kabeungharan budaya, wariskeuneun ka generasi satuluyna. Ku ditetepkeunana dangdut minangka WBTb Indonesia, éta téh pangajén nu luar biasa nu taya hinggana,” pokna.
Béwara dangdut minangka WBTb Indonesia 2023 téh diumumkeun dina Sidang WBTb nu dipokalan ku Tim Ahli WBTb Indonesia.
“Ti taun 2013 tepi ka 2023, aya 77 karya budaya ti Provinsi DKI Jakarta nu geus ditetepkeun jadi WBTb ku Kemdikbudristek RI," ceuk Iwan.
Sajeroning kitu, Direktur Jenderal Kebudayaan Kemendikbudristek, Hilmar Farid, miharep, éta rupa-rupa karya budaya ti sakuliah lemah cai nu jadi WBTb Indonesia, satuluyna bisa dijadikeun bagéan kurikulum pangajaran di sakola-sakola.
Baca Juga: Jadwal Yogaswara Sunandar Sunarya Giriharja 3 Putra Bulan September 2023
"Ku kituna, bakal aya wahana nu salega-legana pikeun generasi ngora geusan mikawanoh jeung micinta rupa-rupa warisan budaya di Indonesia," pokna.
Anapon Sekretaris Tim Ahli WBTb Indonesia, Toto Sucipto, mertélakeun, dina taun 2023, aya 777 usulan pikeun ditetepkeun minangka Warisan Budaya Takbenda (WBTb) Indonesia ti 32 provinsi, Maluku jeung Papua mah henteu ngajukeun usulan.
Sanggeusna seleksi administrasi ku Sekretariat WBTb, antarana niténan kalengkepan data nu ngarojong usulan, antukna aya 265 usulan nu saheulaanan diengkékeun, sarta 512 nu dituluykeun ka tahap sawala Tim Ahli WBTb Indonesia dina Rapat Penilaian Usulan WBTb.
“Sabadana tilu kali Rapat Penilaian Usulan WBTb, ditetepkeun 215 usulan pikeun dipresentasikeun ku Pemda Pengusul dina Sidang Penetapan,” ceuk Toto Sucipto.
Baca Juga: dr. Richard Lee Kembali Pecahkan Rekor Jualan di Shopee Live, Omset 5.5 Milyar Tembus dalam 1.5 Jam
Pangna maké istilah “direkomendasikeun pikeun ditetepkeun” téh alatan nu netepkeunana mah Mendikbudristek dina wangun SK jeung sertifikat.
Satuluyna Toto Sucipto ngébréhkeun, usulan panglobana nu direkomendasikeun pikeun ditetepkeun minangka WBTb Indonesia 2023 téh nyaéta DIY (25), laju Maluku Utara (22), Sumbar (21), Bali (19), Jawa Tengah (16), Jawa Barat (13), Jawa Timur (12), sarta Aceh (11).
Sedengkeun nyutat ti warisanbudaya.kemdikbud.go.id, tepi awal taun 2023 aya 11.711 WBTb ti sakumna provinsi di Indonesia.
Tina éta jumlah, 1.941 warisan budaya nu geus ditetepkeun jeung meunang sertifikat Menteri Pendidikan Kebudayaan Riset dan Teknologi, minangka WBTb Indonesia.***
Baca Juga: Baim Wong Raup Omzet Rp600 Juta dalam 2 Jam Saat Jajal Shopee Live Perdananya
Baca Juga: Disparbud Jawa Barat bakal Mindahkeun Museum Situs Fosil Tambaksari Kabupaten Ciamis ka Urugkasang