GALURA - Dina laga antara Bali United vs Persib Bandung di Stadion Maguwoharjo sababaraha jam deui, senterpur atawa striker Bali Ilija Spasojevic moal maen.
Najan kitu, Bali United boga keneh senterpur nu lincah jeung bahaya mun geus aya di hareupeun gul batur, nyaeta Privat Mbarga.
Ku kituna, sok sanajan Spaso teu maen, Persib kudu sing iatna. Sabab Privat teu mustahil bakal ngancam ka gawang Persib.
Baca Juga: Persib Nyiapkeun 22 Pamaen pikeun Nyanghareupan Bali United di Maguwoharjo, Ieu Berendelanana
Nurutkeun laman Bali United, Spaso bakal absen makalangan lantaran akumulasi kartu koneng salila 4 laga nu dilakonan ku manehna.
Bali United saenyana boga striker sejen sajaba ti Spaso jeung Privat. Manehna nyaeta Lerby Eliandry. Ngan nya kitu, Lerby ayeuna can bisa maen sabada dioperasi balukar cidera.
Nya pamustunganana, striker Bali United ayeuna ngan kari saurang, Privat tea, pamaen nu kaasup bahaya jeung geus ngoleksi 9 gul dina Liga 1 ayeuna.
Baca Juga: Lingkungan Ruksak, Usum Hujan Banjir, Usum Halodo Tigerat ku Cai
Patali jeung eta hal, Privat nembrakkeun yen saenyana mah manehna hayang babarengan makalangan jeung Spaso dina enggoning ngasupkeun bal ka gul Persib.
Ngan hanjakalna Spaso teu bisa maen alatan akumulasi kartu kuning.
Ngan najan kitu, Privat ngaku moal galideur jeung keueung ku lantara Spaso absen.
"Abdi moal keueung. Pamaen payun nu disiapkeun ku palatih pasti tiasa ngeusian posisi Spaso tur tiasa janten mesin gol Bali United," pokna.
Nurutkeun laman Bali United, pikeun ngeusian posisi Spaso, palatih Teco boga dua alternatif.
Kahiji nurunkeun pamaen ngora Kadek Dimas, top skor EPA Liga 1 U-18 2019, nu kadua mindahkeun posisi Jajang Mulyana ka senterpur deui, sabada dipindahkeun jadi pamaen tukang.
Baca Juga: Ratu Wilhelmina Kawin ka Pangeran Hendrik, Perkebunan Pasirmalang Diduruk
Jadi, najan taya Spaso, Bali United masih tetep matak bahaya keur Persib. Persib kudu sing iatna!***