Network
GALURA.CO.ID – Juma’ah, 5 April 2024 digelar panutupan Kampung Ramadhan 1445 H di Komunitas Gada Membaca, Desa Winduraja, Kecamatan Kawali, Kabupaten Ciamis.
Diluuhan ku H. Dadan Wiadi, S.T., MT., MMG., Kepala Dinas Perpustakaan dan Kearsipan Kabupaten Ciamis; Eka Yudha Katresna, S.Sos, MM., Kepala Bidang Pembinaan Paud dan PNF DISDIK Kabupaten Ciamis; Warjo Supriatna, S.IP., Kepala Seksi Pembangunan Kecamatan Kawali, dewan guru sarta undangan lianna.
Dina kagiatan Kampung Ramadhan 1445 H, digelar rupa-rupa acara. Di antarana: game edukasi, Forum Diskusi Organisasi, Kepemimpinan dan Kewirausahaan jeung Pelatihan Menulis. Anu miluanana teu dipulut bayaran nanaon.
Baca Juga: Kelompok Ilmiah Remaja (KIR) SMAN 1 Kawali Ciamis Ngabuburit di Gada Membaca, Nyieun Roket
Kagiatan Kampung Ramadhan 1445 H dimimitian ku lomba ngawaranaan gambar, anu miluanana 126 siswa ti 9 lembaga PAUD/TK/RA. Salian ti eta lomba maca jeung nulis tingkat SD/MI. Lomba macapamilonna 55 siswa jeung lomba nulis pamilonna 60 urang. Keur tingkat SMP diiluan ku 10 urang.
Najan keur hujan ayer-ayeran, nu ngaluuhan panutupan Kampung Ramadhan 1445 H teu wudu loba. Para juara kabeh daratang. Husus keur juara kahiji lomba nulis macakeun karyana. Acara diteruskeun ku ngabagikeun hadiah para juara lomba.
Aat Atiwi (ibu rumah tangga) jadi Pengunjung Teladan, mibanda dua kartu anggota jeung biasa nginjeum 12 buku dua minggu sakali, dileler hadiah paket sembako. Acara panutupan Ramadhan 1445 dipungkas ku buka babarengan.
Komunitas Gada Membaca ngahaturkeun nuhun ka sakumna pihak nu geus ngarojong Kampung Ramadhan 1445 H, babakuna ka Dinas Perpustakaan dan Kearsipan Kabupaten Ciamis, Dinas Pendidikan Kabupaten Ciamis, Tunas Cendekia Foundation.
Lian ti eta, Bank bjb KCP Kawali, Gramedia, Spirit Nabawiyah Community, Pelangi Mizan, UPT Perpustakaan Universitas Galuh, Duta Baca UNIGAL, Galuh Beraksi, Keluarga Mahasiswa Ciamis-Cirebon, Kelompok Ilmiah Remaja SMAN 1 Kawali, jeung pihak-pihak sejenna.*** Naufalia Qisthi, Relawan Komunitas Gada Membaca
