Network
GALURA.CO.ID. – Atlet-atlet ti Kenjujitsu Indonesia ngahontal 12 medali dina kajuaraan Astrajingga Ju-Jitsu Open Championship (AJJOC) 2023.
Éta kajuaraan AJJOC 2023 nu diiluan ku atlet-atlet ti Kenjujitsu Indonesia téh lumangsung di GOR Bulutangkis KONI, Jalan Jakarta, Kota Bandung, 16-17 Desember 2023.
Dina kajuaraan AJJOC 2023, aya 13 atlet putra-putri ti Kenjujitsu Indonesia, 11 urang ti Bandung jeung duaan ti Cirebon, kalawan makalangan dina 16 nomor pertandingan.
Atlet-atlet ti Kenjujitsu Indonesia ngahontal 12 medali dina kajuaraan AJJOC 2023 nu ngawengku 3 medali emas (Fighting System), 4 medali perak (Fighting System jeung Newaza), katut 5 medali perunggu (Newaza).
Baca Juga: Cupu Manik Astagina Radar dina Pawayangan
Tah, atlet-atlet putra-putri ti Kenjujitsu Indonesia nu tanding dina AJJOC 2023 téa, makalangan dina kategori Fighting System (FS) jeung Newaza, dina kelompok umur mimiti 7 taun tepi ka 18 taun, kalawan beurat awakna téh ti 21 kg tepi ka 76 kg.
Anapon Perguruan atawa Dojo Kenjujitsu Indonesia perenahna di lembur Cisintok, Desa Cihanjuang, Kacamatan Parongpong, Kabupaten Bandung Barat. Dina kamekaranana tepi ka kiwari diwengku ku puluhan atlet ti budeureun Bandung jeung disaluareun Bandung.
Arinyana lalatihan di Dojo Kenjujitsu Indonesia rata-rata tilu kali dina samingguna, kalawan dilatih ku para Sensei nu geus kawilang maroyan dina cabang olahraga Ju-Jitsu.
Sesepuh Kenjujitsu Indonesia, Sensei Eko Raharjo, mertélakeun, saméméhna, dina nyanghareupan turnamen AJJOC 2023, para atlet terus diasah kamampuhna, boh perkara teknik tanding Ju-Jitsu boh sual motivasi ngagederkeun sumanget.
Kalawan diwewegan ku numuwuhkeun sikep kadisiplinan, para atlet gé disimbeuhan ku ajén-inajén olahraga kayaning sportivitas, teu weléh siap tanding, sarta méntal nu kuat dina nyanghareupan lawan malar teu kuméok méméh dipacok.
Baca Juga: Kabupaten Bandung Dileler Pangajèn Kabupaten Peduli HAM ti Kemenkum HAM
“Makalangan dina turnamen kalintang pentingna pikeun para atlet minangka barometer kamajuan arinyana geusan ngahontal prestasi sahadé-hadéna. Ieu gé kasempetan hadé sangkan nambahan luang jeung pangalaman tanding ngetrukkeun kamampuhna,” ceuk Sensei Eko Raharjo.
Salila dua poé makalangan dina kajuaraan AJJOC 2023 téa, atlet-atlet Kenjujitsu Indonesia tétéla geus némbongkeun kétak nu pikareueuseun, basaéng jeung 343 atlet séjénna ti 18 perguruan ju-jitsu sa-Indonesia.
Sakabéh atlet ju-jitsu ti Kenjujitsu Indonesia kalawan sumanget ngetrukkeun kamampuhna pikeun ngahontal prestasi sahadé-hadéna. Hasilna, atlet-atlet Kenjujitsu Indonesia meunangkeun 12 medali.
“Éta prestasi tangtu matak pikareueuseun. Ka atlet nu ngahontal medali, ulah ieuh ngarasa gumedé, tapi sing jadi pamecut malar ka hareupna mingkin mampuh ngaronjatkeun prestasi. Kitu deui, ka atlet nu tacan meunangkeun medali, ulah ieuh pegat harepan, tapi sabalikna sing kudu yakin yén dina kajuaraan nu bakal datang mingkin kandel patékadan geusan ngahontal medali. Prestasi bakal mucunghul lamun bari dibarengan ku latihan nu noron kalawan daria,” ceuk Sensei Eko Raharjo.***
Baca Juga: Bupati Bandiung: Pesantren Kilat jang Ngaronjatkeun SDM Nu Profesional
