Network
GALURA.CO.ID -Masarakat jeung seniman Bebegig Sukamantri di Desa Sukamantri, Kecamatan Sukamantri, Kabupaten Ciamis, ahir-ahir ieu keur guligah. Ari nu jadi alatanana pedah Bebegig Sukamantri nu taun 2018 dijadikeun WBtB Nasional teh dina salasahiji chanel youTube disebutkeun Bebegig Malausma Kabupaten Majalengka. Hal ieu diangkat jadi laporan utama Galura cetak II November 2023.
Pikeun ngaguar duduk perkarana Galura ngiangkeun wartawanna ka Desa Sukamantri, nepungan sanggar Bebegig Sukamantri sarta ngobrol jeung tokoh masarakat. Hasil liputanana ditulis dina halaman 1 Galura cetak II November 2023.
Salian ti ngungkab kasang tukang ku naon seni helaran nu nyeples Bebegig Sukamantri bisa tandang dina kirab budaya Kabupaten Majalengka kalayan disebut-disebut kesenian has Malausma oge ngungkab asal muasal lahirna bebegig Sukamantri.
Baca Juga: Piala Dunia 17, Sekda Kabupaten Bandung Cumeluk sangkan ASN Lalajo Pertandingan nu Digelar di SJH
Singhoreng seni helaran bebegig Sukamantri asalna mah kabiasaan prajurit Karajaan Karanggantungan mun keur ngalaksanakeun pancenna. Prajurit Karanggantungan mun keur ngajaga kaamanan di wilayah Karanggantungan sok marake topeng nu dijieun ku tangkal kai bari make asesoris dangdaunan.
Tina kituna jentre bebegig Sukamantri teh mibanda akar budaya jeung sejarah nu kuat. Masarakat Sukamantri mampu ngamumule kabiasaan prajurit Karanggantungan ku cara nyiptakeun seni helaran bebegig Sukamantri. Mun rek ngareuah-reuah agustusan topeng jeung asesorisna sok diteundeun heula di pajaratan, ngarah mibanda sima.
Tulisan sejenna dina Galura cetak II November 2023: Nu Nyumput di nu Caang (Satukangeun Lalangse), nyaritakeun saurang lalaki, pangusaha, nu nyandung bari susulumputan, teu bebeja heula ka pamajikanana. Tapi ahirna kanyahoan.
Rubrik Warna-warni midangkeun tulisan ngeunaan patilasan atawa makam Eyang Dalem Gajah di Kutawaringin Kabupaten Bandung nu unggal poe, beurang peuting, teu weleh loba nu jaroh kalayan boga maksud sèwang-sèwangan.
Baca Juga: BRI bakal Ngarojong Kagiatan PWI Jabar, Sadmiadi: BRI ogé Butuh ku Pangrojong ti Wartawan
Ngeunaan makam Belender di Kalurahan Maleber, Kecamatan Ciamis, Kabupaten Ciamis diguar dina rubrik Nyukcruk Galur. Makam Balender aya nu nyebutkeun eta teh makam Maha Prabu Galuh, aya oge nu nyebutkeun makam Eyang Kaliwon, hulu jurit Kabupaten Galuh.
