Network
GALURA. CO.ID. - Presiden Joko Widodo dipastikeun baris muka Kongres XXV Persatuan Wartawan Indonesia (PWI) kalayan resmi poé Senén, 25 September 2023 di Bandung.
"Alhamdulillah, pihak Istana parantos ngawartosan kapastian hadirna Pa Presiden," ceuk Ketua Umum PWI Pusat Atal Sembiring Depari, Rebo, 20 September 2023, di Sekretariat PWI Pusat, lanté 4 Gedung Dewan Pers, Kebon Sirih, Jakarta.
Penyelenggaraan Kongres XXV PWI taun 2023 baris dimimitian malem Senén (24/9) ku acara jamuan makan malam (welcome dinner) di Gedung Pakuan, rumah dinas Pj Gubernur Jabar Bey Triadi Machmudin.
Isukna, Senén (25/9) isuk-isuk, baris digelar seminar di éL Hotel, Jl. Merdeka, Bandung, tempat lumangsungna Kongres PWI. Seminar dijejeran ku Wamen Kominfo Nezar Patria, Taufan Eko Nugroho Rotosariko, jeung Agus Sudibyo.
Sabada éta, pembukaan resmi Kongres ku Presiden Jokowi.
Baca Juga: Galura Cetak IV September 2023, Ngaguar Pulo Majeti, Rawa Onom, jeung Kampung Siluman di Kota Banjar
Diiluan ku 500 insan pers Indonesia
Panitia Kongres XXV PWI taun 2023 nyebutkeun, yén ieu acara bubuka Kongres Pemilihan PWI Pusat téh diluyukeun jeung waktu anu disayagikeun ku Presiden Jokowi.
"Ieu mungguh pikabungaheun tur pikareueuseun kanggo urang. Presiden Jokowi teu weléh narékahan nyayagikeun waktosna kanggo insan pers. Presiden muka Kongres XXIV PWI di Solo, September 2018, sarta hadir tur muka acara puncak Hari Pers Nasional (HPN) 2023, 9 Februari kalangkung di Medan, Sumatera Utara," ceuk Atal S. Depari.
Dibarengan ku Sekjen PWI Pusat Mirza Zulhadi jeung Ketua Panitia Pelaksana Kongres XXV PWI Marthen Selamet Susanto, Atal S. Depari ngadadarkeun yén persiapan ieu kagiatan pesta demokrasi insan pers nasional téh kiwari geus aya 90 persenna.
