GALURA - Pikeun nyegah sumebarna kasakit polio di wilayah Kota Cimahi, Pemkot Cimahi ngalaksanakeun gelaring Sub PIN Polio, di Kalurahan Melong, Senén, 3 April 2023.
Éta gelaring Sub PIN Polio téh dilakukeun ku Pj. Wali Kota Cimahi, Dikdik S Nugrahawan, dijejeran ku sakumna wawakil instansi.
Dumasar data Kementerian Kesehatan, aya 1,7 juta bayi (0-11 bulan) nu tacan meunangkeun imunisasi kalawan lengkep.
Anapon polio atawa Poliomyelitis téh minangka kasakit nu ngabalukarkeun rasa nyeri, timbulna cacat, tur tilar dunya.
Tah, ku kituna, pikeun nyegah sumebarna polio, dilakukeun kagiatan Sub PIN Polio di sakuliah Jawa Barat ti mimiti 3 April 2023 ku cara Outbreak Response Immunization (ORI).
Sedengkeun dina Sub PIN Polio di Kota Cimahi, aya 46.377 bayi nu jadi sasaran imunisasi kalawan target kahontal 95 persen.
Baca Juga: Sosialisasi Kasehatan Ceuli, Mieling Hari Pendengaran Sa-Dunya 2023 di Kota Cimahi
"Kasakit polio tacan aya ubarna, ukur bisa dicegah ku imunisasi polio,'' ceuk Dikdik S. Nugrahawan, waktu gelaring Sub PIN Polio Kota Cimahi, 3 April 2023.
Imunisasi polio kacida pentingna enggoning nguatkeun budak malar teu katarajang virus polio.
Pon kitu deui, palaksanaan Sub PIN Polio téh lain ukur tanggung jawab Dinas Kesehatan, tapi perlu rojongan ti sakumna masarakat.
"Alhamdulillah, masarakat kalintang antusiasna sangkan anak-anakna diimunisasi polio. Kuring miharep, Kota Cimahi bisa bébas tina kasakit polio geusan ngaronjatkeun ajén sumber daya manusa di Kota Cimahi,” ceuk Dikdik S Nugrahawan.
Baca Juga: Seminar Pikeun Ngaronjatkeun Palayanan Kasehatan Darurat Masarakat
Sub PIN Polio dilaksanakeun ku cara imunisasi Noval Oral Polio Vaccine Type 2 (NOPV2) ka sakumna barudak umur 0-59 bulan.
Dina jirangan kahiji, éta Sub PIN Polio digelar di 15 kalurahan sa-Kota Cimahi, 3-9 April 2023, di posyandu atawa pos PIN lianna.
Sedengkeun Sub PIN Polio jirangan kadua baris dilaksanakeun 15-21 Mei 2023.
Dina prak-prakanana, Dinas Kesehatan Kota Cimahi rukun gawé jeung Fakultas Kedokteran Unjani, Fakultas Ilmu dan Teknologi Kesehatan Unjani, STIKES Budi Luhur, Politeknik Kesehatan Kemenkes, Ikatan Bidan Indonesia Cabang Kota Cimahi, STIKES RS Dustira, IKES RS Rajawali, katut Politeknik TEDC Bandung. ***