Network
GALURA -Ti ngawitan ping 19 Januari 2023, Galura midangkeun carita nyambung (carnyam) nu judulna “Putri Anjungsari”, kenging Nanang Supriatna.
Latar atanapi settingna mangsa puseur dayeuh Pajajaran dikepung ku pasukan koalisi Banten-Cirebon-Demak. Tina kituna sanaos carita fiksi, ieu carnyam ngait kana fakta sajarah.
Urang maos carnyam “Putri Anjungari” tiasa nambihan pangaweruh kana sejarah Sunda, hususna kaayaan Pajajaran sareng wilayahna jaman raja pamungkas.
Sinopsis
Dumasar legenda Panji Boma nu dipikawanoh ku masarakat Kawali, Kabupaten Ciamis, Jawa Barat jeung ku masarakat Dayeuhluhur, Kabupaten Cilacap, Jawa Tengah, Putri Anjungsari teh siwi (putri) raja pamungkas Pajajaran. Ngan henteu jentre ti prameswari nu mana.
Alatan Pakuan Pajajaran terus-terusan digempur ku pasukan gabungan Banten, Cirebon jeung Demak, ditambah hiji senapati Pajajaran biluk ka Banten, Putri Anjungsari ku raja Pajajaran dijurung ngungsi ka Karajaan Panjalu.
Panjalu henteu pati jauh ti urut puseur Karajaan Sunda-Galuh: Kawali. Ku Cirebon, sabada Rajagaluh jeung Talaga diperuhkeun, Kawali kitu deui Panjalu, henteu ditalukkeun sacara militer.
Cirebon nganggap Kawali jeung Panjalu najan nu nyekel pamarentahanana raja, geus henteu boga kakuatan deui. Tina kituna raja Pajajaran mandang Panjalu aman dipake pangungsian siwina.
Ongkoh deuih raja Panjalu masih sarundayan, sakocoran, sarua luluhurna raja-raja Galuh.
Putri Anjungsari anu nyangking elmu bela diri tingkat luhur, kaasup kanuragan, miang ti Karaton Pajajaran wanci janari leutik. Kaluar ti komplek karaton make jalan rusiah.
Putri Anjungsari dibarengan ku embanna, saurang jeung ku prajurit pinilih, tiluan. Raja Pajajaran oge marentah sababaraha prajuritna ngawal rombongan Putri Anjungsari, ngan Putri Anjungsari teu apaleun, kitu deui embanna jeung prajurit nu tiluan.
Prajurit nu ngawal bari demit teh genep urang, tiluan miang leuwih ti heula jeung tiluan deui nuturkeun ti kaanggangan.
Prajurit nu genepan bieu kungsi milu ngagempur pasukan Cirebon di Leles, Garut di deukeut Situ Cangkuang. Harita nu mingpin prajurit Pajajaran teh ngaranna Maktal nu ayeuna dipake ngaran jalan di Kota Garut.
Pasukan Cirebon nu diluluguan ku urang Tionghoa sarta tadina rek ka Pakuan Pajajaran, taya nu nyesa saurang oge.
Prajurit Pajajaran sawareh baralik deui ka Pajajaran sawareh deui deui matuh di wewengkon Garut.
Putri Anjungsari ngajugjug Panjalu make jalan nu kungsi dipake ku Jaya Pakuan waktu rek ngalalana ka Wetan, ka Jawa Tengah jeung ka Jawa Timur sarta diteruskeun ka Bali
Rombongan Putri Anjungsari henteu make jalan nu biasa dipake ku umum. Teu make Jalan Pajajaran nu ku sejarawan disebut trans Pajajaran atawa highway Pajajaran, jalan nu nepungkeun Kawali-Pajajaran.
Ti Sumedanglarang make jalan nu nembus langsung ka wewengkon Kawali. Geusan Ulun waktu mawa Harisbaya ti Cirebon ka Sumedanglarang make ieu jalan, keur macikeuh urang Cirebon nu ngudag Geusan Ulun.
Lalampahan ti Pakuan Pajajaran tepi ka Panjalu merelukeun waktu nu kawilang lila.
Di jalanna keur werit. Telik sandi Cirebon, Banten jeung Demak, teu sirikna tara sare sakerejep oge, bisi raja Pajajaran ngalolos ti Pakuan Pajajaran.
Diluluguan ku Demak, Cirebon jeung Banten ngajalankeun pulitik tumpes kelor: ngaleungitkeun hiji bangsa lain ukur merangan rajana atawa pupuhuna tapi oge narekahan sangkan eta bangsa leungiteun akar budayana.
Ku sabab rea keneh urang Sunda nu hate leutikna angger ngait ka Pajajaran, rombongan Putri Anjungsari bisa anjog ka Kawali kalayan salamet. Kitu deui prajurit nu ngawal ti kaanggangan
Di Karaton Surawisesa, sarerea patepung, ngan kabeh oge ngungun sabab teu weleh ingeteun ka Pakuan Pajajaran. Turug-turug Pakuan Pajajaran beurang peuting digempur ku pasukan Banten, Cirebon jeung Demak.
Teu kabeh milu ka Panjalu. Ukur Putri Anjungsari jeung embanna nu terus ka Panjalu mah. Prajurit nu ngawalna, milih bumen-bumen di tempat sejen.
*
NANANG Supriatna diwedalkeun di Desa Selacai, Kecamatan Cipaku, Kabupaten Ciamis, Jawa Barat. Tamat ti SMAN 1 Kawali neruskeun sakola di Universitas Diponegoro (Undip) Semarang, di jurusan Bahasa dan Sastra Indonesia.
Bari kuliah jadi wartawan freelance di sababaraha media, ngan saterusna mayeng nulis di Galura, dipenta jadi kontributor tetep ku Aan Merdeka Permana, redaktur Galura.
Di sagigireun jadi wartawan, sok nulis carita pondok, boh dina basa Sunda boh dina basa Indonesia.
Dina sastra Indonesia, Nanang taun 1996 juara Harapan I dina Lomba Menulis Cerita Pendek untuk Remaja nu digelar ku Majalah Matra, Jakarta.
Taun 2006, dileler Hadiah Jurnalistik Muh. Kurdi. Dina sastra Sunda, taun 2016, Nanang juara ka-2 Lomba Kritik Sosial dina Wangun Carita Pondok nu diayakeun ku FIPS UPI Bandung.***
