Network
GALURA-Salila proses kampanyeu Pemilu 2024, Panitia Pengawas Pemilu (Panwaslu) Kecamatan Ciniru, Badan Pengawas Pemilu (Bawaslu) Kabupaten Kuningan nampa laporan ti masarakat ngeunaan anu ngarempak aturan kampanyeu.
Aya 37 kasus atawa kajadian anu ngarempak aturan peraturan komisi pemilihan umum (PKP) boh anu ngarempak dumasar peraturan daerah Perda.
Ketua Panwaslu Kecamatan Ciniru, Ade Wahyudi, nyebutkeun dumasar data hasil inventarisasi pengawasan alat peraga kampanyeu (APK) anu ngarumpak aturan teh jumlahna 37 kasus.
Tina jumlah sakitu, 16 kasus anu ngarempak aturan PKPU Taun 2023 Pasal 70, 71 jeung Pasal 79 jeung 21 kajadian ngarumpak perda 2023.
Ade netelakeun, anu ngarumpak aturan dina kampanyeu teh utamana ngait kana sual alat peraga kampanyeu (APK).
Kawas sababaraha calon legislatif ti sababaraha partey boh caleg DPRD kabupaten, DPRD provinsi, pon kitu caleg DPR RI, masang alat peraga anu henteu luyu reujeung katangtuan.
Ceuk Ade, satuluyna sakabeh caleg anu ngarempak dina kampanyeu tangtu ditindak luyu reujeung aturan jeung katangtuan hukum.
"Sadaya anu ngarempak aturan boh aturan PKPU boh perda parantos ditindak sakumaha mistina,"ceuk Ade, basa Pres Release, di Desa Balong, Kecamatan Sindangagung, Saptu, 27 Januari 2024.
Dibaturan ku rengrengan sejenna, di antarana divisi penindakan Erlly Sherliyantie, Ade nganuhunkeun hususna ka pihak masarakat anu milu nalingakeun kana lumangsungna tahapan kampanyeu Pemilu di Kecamatan Ciniru.
