Network
GALURA.CO.ID. - Presiden Joko Widodo nampa Pangurus Persatuan Wartawan Indonesia (PWI) Pusat di Istana Merdeka, Jakarta, Salasa, 7 November 2023. Dina éta pasamoan, Presiden Jokowi dibarengan ku Menteri Sekretaris Negara Pratikno.
Dina éta pasamoan, PWI ngalaporkeun ka Presiden Jokowi ngeunaan geus kapilihna Ketua Umum PWI Pusat, sarta tarékah PWI pikeun ngaronjatkeun kompetensi wartawan.
“Dilaporkeun ka Bapa Presiden yén Ketua Umum PWI anu anyar parantos kapilih dina Kongres PWI di Bandung kaping 25 - 26 Séptémber 2023. Nu kadua, dilaporkeun ogé yén PWI hoyong museur deui kana masalah pendidikan, ningkatkeun kompetensi wartawan, sareng wawasan kabangsaan wartawan," ceuk Ketua Umum PWI Pusat, Hendry Ch Bangun, di Kompleks Istana Kepresidenan, Jakarta, sabada ditarima ku Presiden Jokowi.
Saterusna Hendry nétélakeun, PWI nepikeun pangrojong ti Kementerian Pendidikan, Kebudayaan, Riset dan Teknologi (Kemendikbudristek) jeung Kementerian Badan Usaha Milik Negara (BUMN) dina ngayakeun Sekolah Jurnalisme Indonesia (SJI) jeung Uji Kompetensi Wartawan (UKW). Ceuk Hendry, Presiden ngarespon naon-naon anu ditepikeun ku pihak PWI, sarta nyanggupan pikeun ngawujudkeunana.
“Tadi Bapa Presiden langsung nelepon Menteri Pendidikan dan Kebudayaan kanggo ngabantos PWI deui, supaya naon anu tos dilaksanakeun sateuacanna tiasa jalan deui,” pokna.
Hendry ngadadarkeun, PWI ogé ngabahas sosialisasi pers kabangsaan sakaligus peluncuran Graha Pers Pancasila anu baris dilaksanakeun di Yogyakarta. Salian ti éta, PWI ogé nepikeun hal anu aya patalina jeung acara Hari Pers Nasional (HPN) anu rarancangna baris dilaksanakeun di Ancol, Jakarta.
Baca Juga: Shopee 11.11 Big Sale: Erigo dan JKT48 Kolaborasi Produk Eksklusif dengan Ilustrator Lokal
“Saur Bapa Presiden, upama mémang aya kakirangan ti pamaréntah Provinsi Yogyakarta, pamaréntah pusat baris mantuan,” ceuk Hendry.
Salian ti éta, ceuk Hendry, dina éta pasamoan ogé dibahas ngeunaan pers dina nyikepan/ngaréspon pemilihan umum (pemilu) anu bakal datang. Ceuk Hendry, Presiden ngawanti-wanti ka sakumna masarakat sangkan pemilu tetep damai, tengtrem henteu riceuw, teu aya riributan nanaon.
“Didugikeun ku Presiden, saleresna ayeuna mah teu aya masalah, biasa waé, adem ayem waé, diwanti-wanti supaya sakumna masarakat ngiring aub dina ngajaga pemilu anu damey, anu ngajaga keutuhan bangsa katut nagara, henteu dugi ka memecah belah,” pokna.
Hendry satuluyna negeskeun, yén pamikiran anu diasongkeun ku Presiden Jokowi téh hakékatna mah sarua waé jeung pamikiran inyana minangka Ketua PWI. "Sim kuring gé gaduh émutan anu sami. Pers téh saleresna sanés pihak anu ngaganggu, anu ngomporan, dugi ka suasana jadi harénghéng, suasana jadi teu béda ti event mumusuhan," cenah.***
Baca Juga: Prof.Dr.Ir.Yudi Garnida: Pangwangunan Sektor Tatanen di Nagara Urang Nyugenmakeun
