PAM Tirta Kamuning Rék Nyieun Jaringan Anyar

- 11 Juni 2024, 20:42 WIB
Curug Mangkok, di Désa Cisantana, Kecamatan Cigugur, Kabupatén Kuningan*
Curug Mangkok, di Désa Cisantana, Kecamatan Cigugur, Kabupatén Kuningan* /Ajun Mahrudin/

GALURA-Perusahaan Air Minum (PAM) Tirta Kamuning Perusahaan Umum Daerah (Perumda)  Kabupatén Kuningan, ngararancang baris ngabangun jaringan anyar pikeun nyumponan 3500 palanggan anyar di sabudeureun Kelurahan Cirendang jeung Désa Kedungarum, Kecamatan Kuningan.

Direktur PAM Tirta Kamuning, Ukas Suharfaputra, nyebutkeun pikeun nyumponan palanggan di sabudeureun daerah tersebut, pihakna baris ngamangfaatkeun cai ti mata Cai Curug Mangkok di sabudeureun Dusun Palutungan, Desa Cisantana, Kecamatan Cigugur.

Saméméhna, ceuk Ukas,  pihakna geus ngalakonan survéy pikeun nangtukeun poténsi sumber cai kasebut.

Kurang leuwih 50 léter per detik cai di mata cai Curug Mangkok bisa dimanfaatkeun ku PAM Tirta Kamuning.
Saenyana, cai anu bisa dimangfaatkeun téh 100 léter per detik, tapi keur saheulanan mah rék ngamangfaatkeun 50 léter per detik.

"Ayeuna nuju ngurus heula perizinan, harepan mah taun payun palanggan anyar tiasa kacumponan cai ti Curug Mangkok," ceuk Ukas.

 

Saméméhna, ceuk Ukas, pihakna geus nambahan debit cai pikeun nyumponan kabutuh cai inumeun pikeun palanggan di sabudeureun Kelurahan Purwawinangun, debit cai 10 léter per detik ti mata cai Cijalatong di sabudeureun Kelurahan Winduhérang, Kecamatan Cigugur.

Sajaba éta, ngamangfaatkeun sumber cai Cirukutuk di Désa Cileuleuy,  Kecamatan Cigugur, 10 léter per detik pikeun ngaronjatkeun palayanan konsumen di Jalan Jenderal Sudirman nepika Kelurahan Winduhaji, Kecamatan Kuningan.

“PAM Kuningan ogé nambihan kavasitas cai 10 léter per detik ti mata cai Cibangir Cigugur, masih nganggo jaringan heubeul kanggo wilayah sabudeureun Cirendang,” pokna.***

 

Editor: Ajun Mahrudin


Tags

Artikel Pilihan

Terkini

Terpopuler

Kabar Daerah