GALURA- Rusda (80), urang Desa Kapandayan, Kecamatan Ciawigebang, Kabupaten Kuningan, tilar dunya alatan kabawa palid cai di walungan CI Sanggarung, lelewek Desa Jatimulya, Kecamatan Cidahu, Rebo (3/1/2024), kira wanci tabuh 9.55 WIB.
Ceuk Kepala Badan Penanggulangan Bencana Daerah (BPBD) Kabupaten Kuningan, Indra Bayu Permana, layon korban kapanggih ku salasaurang warga anu keur nguseup di eta walungan.
Indra Bayu nyebutkeun, samemehna Rusda kabejakeun leungit ti mimiti poe Senen, 1 Januari 2024.
Samalah, samemehna oge geus aya anu ngaduga Rusda kabawa palid walungan Cigresik sabudeureun Desa Kapandayan, Kecamatan Ciawigebang.
Cai walungan Cigresik ngamalir tepung jeung walungan CI Sanggarung.
Ceuk Indra Bayu, satuluyna, samemeh kabejakeun leungit, pihak kulawarga mikanyaho Rusda miang ka kebon deukeut walungan Cigresik.
Miangna teh numpak sapedah sorangan. Pihak kulawarga deudeupeun, ku sabab ti isuk mula nepika beurang manehna tacan mulang ka imah.
Diteang ka lebah kebon, anu kasampak saukur sapedah anu biasa dipake ku Rusda.
Salila dua poe ti saprak Rusda kabejakeun leungit, tim gabungan ngawengku BPBD, TNI Polri, masarakat jeung pamarentah maluruh eta warga anu leungit
Sajeroning kitu, aya beja salasaurang warga anu keur nguseup di walungan CI Sanggarung manggihan layon di eta walungan.