Network
GALURA- Sanggeus ditetepkeun dina calon tetap (DCT) anggota DPR RI Daerah Pemilihan (Dafil) X Jabar (Kuningan Ciamis Banjar Pangandaran), ti Partai Gerindra, H. Rokhmat Ardiyan, M.M., gilig pikeun tandang makalangan dina pemilu 2024.
Samemehna, dina daftar pemilih sementara (DCS), ngaran Rokhmat Ardiyan aya dina nomer urut 1. Kiwari robah jadi nomer urut 2.
Sanajan kitu, keur Rokhmat Ardiyan henteu jadi pasualan. Anu keur disanghareupan kiwari, museur narekahan pikeun unggul dina pemilu 2024.
Ceuk Rokhmat Ardiyan, anu dimaksud unggul di dieu, ngandung harti lain pikeun sadirieun inyana jadi anggota DPR RI.
Leuwih ti kitu, salaku kader partey miboga tanggungjawab pikeun merjoangkeun pasangan Prabowo-Gibran jadi Presiden-Wakil Presiden RI.
Rokhmat Ardiyan negeskeun, robah tina nomer urut hiji jadi nomer urut dua, eta minangka kawijakan ti idewan pimpinan pusat.
"Ayeuna di DCT nomer urut simkuring sami sareng nomer urut Partey Gerindra nyaeta nomer urut dua. Mugia ku robahna nomer urut janten berkah," ceuk Rokhmat Ardiyan, Ahad, 5 November 2023.***
