Peribahasa Sunda, Harti Kecap jeung Conto Ngalarapkeunana dina Kalimat

- 30 Maret 2023, 17:40 WIB
Salahsahiji sasajen dina hiji ritual kasundaan. Dina ritual kasundaan dina biantara pupuhuna mindeng diselappan peribahasa Sunda.
Salahsahiji sasajen dina hiji ritual kasundaan. Dina ritual kasundaan dina biantara pupuhuna mindeng diselappan peribahasa Sunda. /Nanang S/Galura

GALURA -Peribahasa Sunda teh salasahiji bentuk sastra Sunda. Teu beda jeung peribahasa Indonesia, peribahasa Sunda eusina amanat, papatah, pepeling, papagon, palsapah jeung tuntunan. Di handap ieu diterangkeun harti 10 peribahasa Sunda, diterangkeun harti kecap sarta conto makena dina kalimat.

1.Asa ngadéngé gelap tengah poé éréng-éréngan: kagét pisan lantaran teu disangka-sangka acan saméméhna; Ngadéngé béja manéhna ditahan ku pulisi pédah kabaud ku narkoba asa ngadéngé gelap tengah poé éréng-éréngan. Atuda katempona téh bageur jeung lungguh..
Déngé, ngadéngé, nyaksian sarta merhatikeun sora ku ceuli.
Gelap, guludug, sora nu ngajegér sabada aya kilat.
Tengah poé éréng-éréngan, wanci jam 12 beurang waktu keur meumeujeuhna panas panonpoé .

2.Ati mungkir beungeut nyanghareup: ari di hareupeun mah siga nu enya bageur, nurut, unggeuk-unggeukan, tapi tukangeun ngomongkeun atawa ngagogoréng; Tong kitu ka dunungan téh, di hareupeun mah siga enya bageur, nurut, tapi ari tukangeun mah ngutruk, ati mungkir beungeut nyanghareup manéh mah.
Ati, haté.
Beungeut, bagéan hareup sirah.
Nyanghareup (harti injeuman), nurut, ngéstokeun.
Pungkir, mungkir (tina basa Arab), nolak, teu narima, ngangles.

3.Aya nu dianjing cai: remen ngalaksanakeun hiji hal kalayan boga maksud atawa boga tujuan nu tangtu, aya nu dihéroan; Pangna ayeuna remen balanja ka warung Bi Enok teh tuda aya nu dianjing cai, hayang wawuh jeung anakna nu mencrang.
Anjing cai (wawangsalan), hartina séro, sato nu kadaharanana lauk, carana néwak lauk sok ngadodoho heula.

4.Ayakan tara meunang kancra: modal leutik moal mungkin meunang kaantungan badag nu sarua jeung modal gedé; Emang mah dagang leuleutikan, batina ogé ukur cukup keur dahar, tuda ayakan mah tara meunang kancra.
Ayakan, anyaman carang tina hinis awi, bentukna buleud, diwengku, biasana dipaké ngala lauk nu laleutik.
Kancra, ngaran lauk sajenis jeung lauk emas.
Tara, singgetan tina teu ara, moal bisa, moal mungkin kajadian.

5.Balungbang timur jalan gedé sasapuan: ihlas, rido, beresih haté, teu ngunek-ngunek; Emang mah balungbang timur jalan gedé sasapuan, éstu ngahampura kana kasalahan hidep.

Balungbang, kamalir atawa solokan gedé jeung jero.
Sapu, alat paranti ngumpulkeun runtah, kalakay jeung sabangsana; Sasapuan, mindeng jeung maneuh disapuan, lalening.
Timur (basa Melayu), wétan.

Halaman:

Editor: Nanang Supriatna


Tags

Artikel Pilihan

Terkait

Terkini

Terpopuler

Kabar Daerah

x