Network
GALURA- FIFA ngabolaykeun Indonesia jadi tuan rumah Piala Dunia U 20, hartina Stadion Si Jalak Harupat Kabupaten Bandung ogè teu jadi salahsahiji venue pertandingan.
Bupati Bandung Dadang Supriatna hanjelu ku kaputusan FIFA nu ngabatalkeun Indonesia jadi tuan rumah Piala Dunia U 20. Saniskara tatan-tatanna geus dilaksanakeun, kaasup ngalengkepan pasilitas Stadion Si Jalak Harupat.
Ku rencana jadi pertandingan Piala Dunia U 20, Stadion Si Jalak Harupat jadi leuwih lengkep. “Ku margi FIFA nyepeng kakuasaan kanggo mutuskeun, urang tetep kedah ngajènan kaputusanana, sanaos paraosan kacida hanjelu, " ceuk Bupati Bandung Rebo (29/3/23).
Baca Juga: RSUD Bedas Kertasari Diresmikeun, Bupati Bandung: RS Lain keur Nyiar Kauntungan
Dadang Supriatna ngaku, satadina kacida miharep sangkan Piala Dunia U 20 tetep bisa dilaksanakeun di Indonesia, ngarojong nu jadi kawijakan Presiden Jokowi jeung miharep sangkan Ketua Umum PSSI mampu ngalobi FIFA dina sawala di Doha Qatar.
Kahayang pikeun jadi pribumi ceuk Dadang dibuktikeun ku dukungan ngetrukkeun sagala kamampuan pikeun ngalengkepan sarana prasarana Stadion Si Jalak Harupat luyu jeung standar nu ditetepkeun FIFA.
"Candak hikmahna wè, para pamingpin nasional sareng daerah teu kedah nambahan konflik margi bènten pandangan" ceuk Dadang.
Bupati nganuhunkeun ka Presiden RI, Ketua Umum PSSI katut sakumna pihak geus mercaya ka Stadion Si Jalak Harupat jadi salasahiji tempat Piala Dunia U 20, najan antukna teu jadi dilaksanakeun di Indonesia. *** Sopandi
